काठमाडौँ । कर्जा तिर्न नसकेपछि तुलसी सहकारीको सम्पत्ति लिलाम हुने भएको छ । करिब दुई वर्षअघि सहकारीले लिएको १० करोड रुपैयाँ चालु पूँजी कर्जा तिर्न नसकेको भन्दै राष्ट्रिय सहकारी बैंकले विराटनगरको तुलसी सहकारीको नाममा रहेको सम्पत्ति लिलाम गर्न लागेको हो ।
सहकारी बैंकले तुलसी सहकारीको नाममा मालपोत कार्यालय विराटनगरमा दर्ता रहेको मोरङ साविकको बैजनाथपुर गाविस–१ को कित्ता नम्बर ७३२ को ५०८.७४ वर्गमिटर र कित्ता नम्बर ७३३ को २९०१.२६ वर्गमिटर जग्गा लिलामीका लागि सूचना निकालेको छ । त्यस्तै, सहकारी बैंकले मोरङ साविकको झोराहाट गाविस–६ को कित्ता नम्बर ५८७ को १३५५.६० वर्गमिटर जग्गा र त्यसले चर्चेको लिगलगापात समेत लिलाम गर्न लागेको छ ।
त्यस्तै, मालपोत कार्यालय दमक झापामा दर्ता श्रेस्ता कायम गरकेो झापा नगरापालिका–१ को कित्ता नम्बर २५२४ को ४३९३.६२ वर्गमिटर र कित्ता नम्बर २५२६ को ५५६५ वर्गमिटर जग्गा र त्यसले चर्चेको लिगलगापात समेत सहकारी बैंकले लिलामीमा निकालेको छ ।
पटकपटकको ताकेताप्रश्चात पनि कर्जाको साँवा र ब्याज भुक्तानी नभएको र नवीकरण पनि नभएकोले धितो लिलाम गरेर कर्जा असुल गर्न लागेको राष्ट्रिय सहकारी बैंकले जनाएको छ ।
सहकारीको नाममा रहेको सम्पत्ति लिलाम हुने भएपछि निक्षेपकर्ताको बचत फिर्ता हुने सम्भावना पनि मर्दै गएको छ । दुःख गरेर बचत गरेको रकम सहकारीमा डुबेपछि सहकारीको नाममा रहेको सम्पत्ति बेचेरै भए पनि रकम फिर्ता आउने आशमा रहेका बचतकर्ताहरु अहिले थप चिन्तामा परेका छन् ।
