काठमाडौँ । नेपाल इन्भेष्टमेन्ट मेगा बैंकका डेपुटी सीइओले दिएको मानसिक यातनाका कारण बैंकका शाखा प्रबन्धक बेहोस भई हाल अस्पताल भर्ना भएका छन् । बैंकका डेपुटी सीइओ बिजेन्द्र सुवालले अपशब्दसमेत प्रयोग गरी, गालीगलौच गरेर निरन्तर टर्चर दिएपछि बैंकको चरिकोट शाखाका प्रमुख कपिल भण्डारी बेहोस भई ढलेका हुन् । हाल उनको उपचार भईरहेको छ ।
बैंकका डेपुटी सीइओले अत्याधिक टर्चर दिएपछि बेहोस भएका उनलाई स्थानीय छोरोप्ला जनरल अस्पतालमा उपचार गराईएको थियो । त्यहाँ पूरा उपचार सम्भव नभएपछि उनलाई थप उपचारका लागि दोलखा बाहिर पठाइएको छ ।
‘मलाई डेपुटी सीइओले ‘तँ चोर, सा*, मु*’ लगायतका अपशब्द प्रयोग गरेर गाली गर्नुभयो । एकदुईपटक त ठिकै हो भनेर सहेँ, हदै भएपछि म बेहोस भएर ढलेछु ।’ अर्थ सरोकारसँग कुराकानी गर्दै भण्डारीले भने, ‘बेहोस भएको थिएँ, होस खुल्दा अस्पतालमा रहेछु । अव बाँच्छु भन्ने आश छ ।’
तपाईंलाई गालीचाहिँ किन गरेको ? अर्थ सरोकारको प्रश्नमा भण्डारीले भने- ‘उहाँको बानी नै गाली मात्र गर्ने रहेछ । मधेशका साथीहरुलाई पनि ‘म**’ भनेर गाली गर्नुहुनेरहेछ । उहाँकै कारण धेरै कर्मचारीहरु पीडीत बनेको स्थिति छ । गाली गरेको कारणचाहिँ काम बढी गर्नुपर्यो भनेर रे । दिनरात खटिएकै छ, काम गरिएकै छ । घरपरिवार केहि नभनी काम गर्दा पनि उहाँलाई पुगेन रे । ऋणीले तिर्न नसकेको ऋण जसरी पनि उठाउनुपर्यो रे ।’
हाल उपचार गराईरहेका उनी आफ्नो स्वास्थमा केहि सुधार देखिएको बताउँछन् । डेपुटी सीइओकै टर्चरका कारण प्रेसर बढेको छ । कुनबेला के हुन्छ, थाहा छैन । बाँच्ने आशाचाहिं पलाएको छ ।’
यता बैंकका सूचना अधिकारीसमेत रहेका डेपुटी सीइओ सुवालले भने यस विषयमा प्रतिक्रिया नै दिन चाहेनन् । हामीले भण्डारीको स्वास्थ अवस्था र घटनाको बारेमा जानकारी लिन फोन गर्दा सुवालले फोन नै काटिदिए र आफुलाई एसएमएस लेख्न सन्देश पठाए । हामीले एसएमएसमार्फत घटनाबारे विवरण माग्दा पनि उनले कुनै प्रतिक्रिया दिएनन् ।
