काठमाडौँ । सहकारी ठगी कसुरमा पक्राउ परेकी इमेज बचत तथा ऋण सहकारी संस्थाकी कोषाध्यक्ष लक्ष्मी सेन सुनारलाई कारागार चलान गरिएको छ । जिल्ला अदालत बागलुङले सुनारलाई पुर्पक्षका लागि कारागार चलान गर्न आदेश दिएको हो । सोही आदेशअनुसार उनलाई कारागार चलान गरिएको जिल्ला प्रहरी कार्यालय बागलुङले जनाएको छ ।
बचतकर्ताको करोडौँ हिनामिना गरेको कसुरमा सुनारविरुद्ध गत असार १० गते नै पक्राउ पुर्जी जारी भएको थियो । तर, त्यसयता उनी फरार थिइन् ।
सुनारलाई प्रहरीको केन्द्रीय अनुसन्धान ब्युरो (सीआईबी)ले गत बिहीबार ललितपुर महानगरपालिका–३ धोबिघाटबाट पक्राउ गरेको थियो । त्यसपछि जिल्ला अदालतमा बागलुङमा पेस गरिएकी सुनारलाई अदालतले कारागार चलान गर्ने आदेश दिएको हो । उनीसहित सहकारीका सञ्चालकमाथि बचतकर्ताको डेढ अर्बभन्दा बढी रकम हिनामिना गरेको आरोप लागेको छ ।
हाल संस्थाका अध्यक्ष तथा ढोरपाटन नगरपालिकाका नगरप्रमुख देवकुमार नेपाली भने अझै फरार छन् । फरार रहेका नेपालीलाई पक्राउ गर्न प्रहरीले इन्टरपोलमार्फत ‘रेड कर्नर’ नोटिस समेत जारी गरिसकेको छ ।
