काठमाडौँ । पोखरामा सच्चाई केन्द्रका अध्यक्षसँग फिरौती माग्ने दुईजना पक्राउ परेका छन् । सच्चाई केन्द्रका अध्यक्ष प्रकाशदीप गैरेसँग ५ करोड फिरौती मागेको आरोपमा दुई जना पक्राउ परेका हुन् । 

पक्राउ पर्नेमा कुश्मा नगरपालिका–२ का ३६ वर्षीय लक्ष्मण दर्जी र ४२ वर्षीय दीपकबहादुर क्षेत्री रहेका छन् । उनीहरुले अध्यक्ष गैरेसँग ५ करोड रुपैयाँ फिरौती मागेका थिए । 

फिरौती रकम नदिए जे पनि हुन सक्ने भन्दै धम्की दिएपछि प्रहरीमा परेको उजुरीका आधारमा दुवै जनालाई पक्राउ गरिएको जिल्ला प्रहरी कार्यालय कास्कीले जनाएको छ । प्रहरीका अनुसार उनीहरुको साथबाट गाँजा, खुकुरी, नेपाल तथा भारतका विभिन्न सिम र मोबाइल बरामद गरिएको छ । उनीहरुमाथि थप अनुसन्धान भइरहेको प्रहरीले जनाएको छ ।