">
काठमाडौँ । बैंकिङ कसुरमा सेञ्चुरी कमर्सियल बैंकका तत्कालीन सीईओ तुल्सीराम गौतम पक्राउ परेका छन् । प्रहरीको केन्द्रीय अनुसन्धान ब्यूरो (सीआईबी)ले बैंकिङ कसुरमा गौतमलाई पक्राउ गरेको हो ।
सीआईबीले गौतमसँगै सेञ्चुरी कमर्सियल बैंकका तत्कालीन चिफ क्रेडिट अफिसर राजेश भण्डारीलाई पनि पक्राउ गरेको छ । यस्तै, प्रहरीले दिलिप बराल, दिपेश प्रधान र रमण श्रेष्ठलाई पनि पक्राउ गरेको छ । पक्राउ परेका बराललाई तल्कालीन सीईओ तुल्सीराम गौतले माछापुच्छ्रे बैंकबाट सेञ्चुरीमा ल्याएका थिए । उनी बैंकको रिस्क हेडका रुपमा कार्यरत थिए ।
यता पक्राउ परेका दिपेश प्रधान नेपाल राष्ट्र बैंकको पूर्व डेपुटी गभर्नर शिवराज श्रेष्ठका आफन्तसमेत हुन् । त्यस्तै, प्रहरीले पक्राउ गरेका रमण श्रेष्ठ तत्कालीन सेञ्चुरी बैंकको बागमती प्रदेश प्रमुखका रुपमा कार्यरत थिए । त्यस्तै, सोही प्रकरणमा सीआईबीले सविन घिमिरे, अनुपमा श्रेष्ठ प्रधान, सुवास बहादुर श्रेष्ठ र सुनिल बस्नेत राजेश भण्डारीलाई पनि पक्राउ गरेको छ ।
सेञ्चुरी कमर्सियल बैंकमा हुँदा कम धितो राखेर बढी ऋण प्रवाह गरेको पाइएपछि सीआईबीले उक्त प्रकरण अनुसन्धान गरिरहेको थियो । सोही क्रममा उनीहरुलाई पक्राउ गरिएको सीआईबीले जनाएको छ ।
सीआईबीको अनुसन्धानबाट पक्राउ परेको तत्कालीन सीईओसहितले तत्कालीन समयमा रवीन्द्र चौलागाईं सञ्चालक रहेको पूजा मार्केटिङ प्रा.लि, उनकी श्रीमती पूजा खत्री सञ्चालक रहेको पूजा ट्रेडिङ्स एण्ड मार्केटिङ कम्पनी र रवीन्द्र र पूजा नै सञ्चालक रहेको थ्री ब्रदर्श मार्केटिङ प्रालिका नाममा ऋण प्रवाह गरेको पाइएको छ । सीआईबी स्रोतका अनुसार यी बाहेक रवीन्द्र नै सञ्चालक रहेको अन्नपूर्ण डिस्टिलरी प्रलिको नाममा पनि कम धितो राखेर बढी ऋण प्रवाह गरेको भेटिएको छ ।
त्यस्तै, उक्त प्रकरणमा सीआईबीले सेञ्चुरी कमर्सियल बैंकका तत्कालीन सीईओ मनोज न्यौपानेलाई यसअघि नै पक्राउ गरिसकेको छ । हाल सेञ्चुरी कमर्सियल बैंक प्रभु बैंकमा गाभिईसकेको छ । हाल सेञ्चुरी कमर्सियल बैंक प्रभु बैंकमा गाभिईसकेको छ ।
