">
काठमाडौँ । कम धितो राखेर बैंकबाट धेरै ऋण प्रवाह गरेको आरोपमा सेञ्चुरी कमर्सियल बैंकका तत्कालीन प्रदेश प्रमुख रमण श्रेष्ठ पनि पक्राउ परेका छन् । प्रहरीको केन्द्रीय अनुसन्धान ब्युरो (सीआईबी)ले तत्कालीन सेञ्चुरी कमर्सियल बैंकको बागमती प्रदेश प्रमुख श्रेष्ठलाई पक्राउ गरेको हो ।
उनीसँगै सीआईबीले बैंकका तत्कालीन सीईओ तुल्सिराम गौतम र मनोज न्यौपानेलाई पनि पक्राउ गरेको छ ।
उक्त प्रकरणमा बैंकका तत्कालीन चिफ क्रेडिट अफिसर राजेश भण्डारी, तत्कालीन रिस्क हेड दिलिप बराल र दिपेश प्रधान पनि पक्राउ परेका छन् । त्यस्तै, सोही प्रकरणमा सीआईबीले सविन घिमिरे, अनुपमा श्रेष्ठ प्रधान, सुवास बहादुर श्रेष्ठ र सुनिल बस्नेतलाई पनि पक्राउ गरेको छ । हाल उनीहरुलाई म्याद थपका लागि अदालत लैजाने तयारी गरिएको सीआईबी स्रोतले जनाएको छ ।
सीआईबीको अनुसन्धानबाट पक्राउ परेको तत्कालीन सीईओसहितले तत्कालीन समयमा रवीन्द्र चौलागाईं सञ्चालक रहेको पूजा मार्केटिङ प्रा.लि, उनकी श्रीमती पूजा खत्री सञ्चालक रहेको पूजा ट्रेडिङ्स एण्ड मार्केटिङ कम्पनी र रवीन्द्र र पूजा नै सञ्चालक रहेको थ्री ब्रदर्श मार्केटिङ प्रालिका नाममा ऋण प्रवाह गरेको पाइएको छ । सीआईबी स्रोतका अनुसार यी बाहेक रवीन्द्र नै सञ्चालक रहेको अन्नपूर्ण डिस्टिलरी प्रलिको नाममा पनि कम धितो राखेर बढी ऋण प्रवाह गरेको भेटिएको छ ।
तत्कालीन सेञ्चुरी कमर्सियल बैंक करिब १० अर्बको बैंक थियो । सो मध्ये २ अर्बभन्दा बढी ऋण डुब्ने खतरा छ । हाल सेञ्चुरी कमर्सियल बैंक प्रभु बैंकमा गाभिईसकेको छ ।
