काठमाडौँ । नेपाल राष्ट्र बैंकका गभर्नर महाप्रसाद अधिकारीले नेपालको बैंकिङ क्षेत्र दक्षिण एशियामै सबैभन्दा सुरक्षित र पारदर्शी रहेको दाबी गरेका छन् । आइतबार प्रतिनिधिसभा अन्तर्गतको अर्थ समितिको बैठकमा बोल्दै गभर्नर अधिकारीले यस्तो दाबी गरेका हुन् ।
तुलनात्मक रुपमा नेपालको बैंक तथा वित्तीय संस्था दक्षिण एशियामै सुरक्षित र पारदर्शी रहेको बताउँदै उनले बैंकहरुसँग क्यापिटल इक्विटी सूचकलाई सुरक्षितको रुपमा हेर्न सकिने बताएका छन् । ‘नेपालको बैंक वित्तीय संस्थाको अवस्था अहिले दक्षिण एशियामा नै सुरक्षित र पारदर्शी छ । क्यापिटल इक्विटीलाई सुरक्षितको रुप हेर्न सकिन्छ ।’, उनले भने, ‘लोन पोर्टफोलियो बढाउनको लागि क्यापिटल बढाउनुपर्ने स्थिति छ । बैंकहरुसँग लगानी गर्ने ६ खर्ब रुपैयाँको तरलता छ । ६ खर्ब रुपैयाँ लगानी गर्नसक्ने क्षमता छ ।
त्यस्तै, गभर्नर अधिकारीले पछिल्लो समय कर्जाको गुणस्तरमा भने कमी आएको बताएका छन् । हाल बैंकहरुको खराब कर्जा (एनपीए) ३.४० प्रतिशत पुगेको उनले उल्लेख गरेका छन् ।
‘बैंकहरुको अर्को महत्वपूर्ण सूचक एनपीए कर्जाको गुणस्तर हो । जुन कर्जाको गुणस्तर अहिले खस्केको छ ।’, उनले भने, ‘बैंकहरुको खराब कर्जा ३.४० प्रतिशत पुगेको छ । खराब कर्जा बढ््नुको मुख्य कारण समग्र बजारको अवस्था, अर्थतन्त्रमा सिथिलता, ऋणको आम्दानी क्षमतामा कमी आउनु र बजारमा आएका अनावश्यक हल्ला र अराजक अभिव्यक्ति हुन् ।’
त्यस्तै, उनले बचतकर्ताहरुले बचत गरेको निक्षेप भन्दा ३ गुणा बढी बैंकहरुसँग सम्पत्ति रहेकाले डराउनु पर्ने अवस्था नभएको दाबी गरेका छन् । राष्ट्र बैंकको नियमन र नियन्त्रण अन्तर्राष्ट्रिय स्तरको रहेकोले अरु देशको सूचक हेर्दा नेपालका बैंकहरुको सूचक राम्रो रहेको उनले बताएका छन् ।
