काठमाडौँ । सोमबार बिहान बस्ने भनिएको सत्ता गठबन्धनको बैठक स्थगित भएको छ । मन्त्रीमण्डल हेरफेर र सुशासनका विषयमा माओवादी केन्द्र र नेपाल काँग्रेसबीच कुरा नमिलेपछि सोमबार बिहान बस्ने भनिएको गठबन्धनको बैठक स्थगित भएको हो ।
यसअघि दुई पार्टीबीच देखिएको असमझदारी टुंग्याउनका लागि सोमबार (आज) बिहान ८ बजेका लागि प्रधानमन्त्रीको सरकारी निवासमा सत्ता गठबन्धनको बैठक डाकिएको थियो ।
सोमबारको बैठकमा विवादित मन्त्रीहरुलाई राजीनामा गराउने विषयमा प्रस्ताव ल्याउने तयारीमा प्रधानमन्त्री पुष्पकमल दाहाल (प्रचण्ड) थिए । गठबन्धनमा मन्त्रीहरुको हेरफेर गर्ने दाहालको प्रस्ताव दुई महिनादेखि अरु नेताहरुले अस्वीकार गर्दै आएका थिए । तर, बैठकबाट उक्त विषय टुँगोमा पुग्ने संकेत नदेखिएपछि बिहानका लागि बोलाइएको बैठक स्थगित भएको हो ।
यता राष्ट्रिय सभाको अध्यक्ष निर्वाचन र अन्य राजनीतिक घटनाक्रमले असमझदारी बढाउँदा वर्तमान गठबन्धनमै जोखिम पर्न सक्ने देखेपछि कांग्रेस सभापति शेरबहादुर देउवा लचिलो बनेका छन् ।
