काठमाडौँ । जिल्ला अदालत काठमाडौँले बच्चा चोरीको आरोपमा पक्राउ परेकी मनकुमारी सिंहलाई धरौटीमा छोड्न आदेश दिएको छ । अदालतले थापाथलीस्थित प्रसूति तथा स्त्रिरोग अस्पतालबाट बच्चा चोरीको आरोपमा पक्राउ परेकी २४ वर्षीया सिंहलाई १ लाख ५० हजार रुपैयाँ धरौटीमा छोड्न आदेश दिएको हो ।
दैलेखको नौमुले घर भएकी सिंहलाई जिल्ला अदालत काठमाडौँका न्यायाधीश माधवप्रसाद अधिकारीको इजालसले १ लाख ५० हजार धरौटीमा छोड्न आदेश दिएको हो ।
प्रसुति गृहबाट २६ दिने बालिका चोरी गरेको आरोपमा गत फागुन ११ गते पक्राउ परेकी सिंहलाई जिल्ला सरकारी वकिल कार्यालय काठमाडौँले अपहरण तथा शरीर बन्धक कसुरको अभियोगपत्र दायर गरेको थियो । उनले काभ्रेको चौरीदेउराली गाउँपालिका–३ घर भएर कपन बस्ने सबिना श्रेष्ठको २६ दिने बच्च चोरेकी थिइन् ।
