काठमाडौँ । केदारनाथ शर्माको शिवशिखर बहुउद्धेश्यीय सहकारी संस्थामा ११ अर्ब रुपैयाँ भन्दा बढीको माग दाबी परेको छ । समस्याग्रस्त उक्त सहकारीमा ३२ हजार ५ सय जना बचतकर्ताहरुले ११ अर्ब रुपैयाँ बराबरको माग दाबी गरेका हुन् ।
समस्याग्रस्त सहकारी व्यवस्थापन समितिले अनलाइनमार्फत माग दाबी गर्न आह्वान गरेपछि ३२ हजार ५ सय जना बचतकर्ताहरुले प्रमाणसहित ११ अर्ब रुपैयाँ बराबरको मागदाबी पेश गरेका हुन् ।
यता शर्मा अध्यक्ष रहेको तुलसी सहकारीमा पनि बचतकर्ताहरुले डेढ अर्ब बढीको माग दाबी परेको समस्याग्रस्त सहकारी व्यवस्थापन समितिले जनाएको छ । समितिका अनुसार मागदाबी आह्वान गरिएकोमा सहकारीका ५ हजार ३ सय ८१ जना बचतकर्ताले १ अर्ब ८५ करोडको माग दाबी पेश गरेका हुन् ।
यी दुवै सहकारीलाई भूमि व्यवस्था, सहकारी तथा गरिबी निवारण मन्त्रालयले समस्याग्रस्त घोषणा गरिसकेको छ ।
सहकारी विभागका सिफरिसमा शिवशिखर बहुउदद्देश्यीय सहकारी संस्था र तुलसी बहुमुखी सहकारीलाई २५ भदौ २०८० मा नै समस्याग्रस्त घोषणा गरिएको थियो । हाल सहकारी ठगी प्रकरणमा संस्थाका अध्यक्ष केदारनाथ शर्मा पुर्पक्षका लागि जेल चलान भएका छन् ।
