काठमाडौँ । नेपाल विद्युत प्राधिकरणका कार्यकारी निर्देशक कुलमान घिसिङले चार्जिङ स्टेशनमा लगानी बढाउन लगानीकर्ताहरुलाई आह्वान गरेका छन् । बिहीवार काठमाडौँमा याडिया जि-६ विद्युतीय स्कुटर सार्वजनिक कार्यक्रममा बोल्दै घिसिङले यस्तो आह्वान गरेका हुन् ।
उनले सरकारले सबैभन्दा पहिला प्रोत्साहनका लागि देशभरका विभिन्न स्थानमा गरी ५१ वटा चार्जिङ स्टेशन राखेको भए पनि अहिलेसम्म आइसक्दा विद्युत प्राधिकरण र निजी क्षेत्र मिलेर देशभरका विभिन्न स्थानहरुमा करिव ४ सय वटा फास्ट चार्जिङ स्टेशन राखिएको बताएका छन् । एकै ठाउँमा चार्जिङ स्टेशनहरु बढी भएकाले यस सम्बन्धी नीति बनाइदिन लगानीकर्ताहरुले आग्रह गरिरहेको घिसिङले उल्लेख गरेका छन् । ।
त्यस्तै, घिसिङले धुलिखेलदेखि सिन्धुली बर्दीवाससम्म धेरै संख्यामा चार्जिङ स्टेशन बनेकोसमेत बताएका छन् । चार्जिङ स्टेशनमा गरिएको लगानी पट्रोल पम्पमा गरिने लगानी भन्दा ठूलो हुने कुलमानको भनाई छ । प्राधिकरणले चार्जिङ स्टेशनबाट नाफा कमाउन नभई प्रोत्साहनका लागि लगानी गरिरहेको उल्लेख गर्दै प्राधिकरणका कार्यकारी निर्देशक घिसिङले प्राधिकरणको प्रतियुनिट मूल्य ९ रुपैयाँ पर्ने भएपनि राति चार्ज गर्दा ५ रुपैयाँ ७५ पैसामै दिने गरेको बताएका छन् ।
अबको पुस्ताले इलेक्ट्रिसिटीमा सबै काम गर्नेगरी विकास गर्न आवश्यक रहेको कुलमानको भनाई छ । साथै उनले ‘इलेक्ट्रिफाइ योर लाइफ’ सबैको नारा बन्नुपर्ने पनि कार्यक्रममा बताएका छन् ।
