काठमाडौं। गणपती लघुवित्त वित्तीय संस्था लिमिटेडले व्यावसायिक तरकारी खेती तालिम प्रदान गरेको छ । लघुवित्तको शाखा कार्यालय मनहरिले सीप विकास मार्फत उद्यमशिलता विकासमा टेवा पुरयाउने उद्देश्यले मनहरि -७ मकवानपुरमा ग्राहक सदस्य महिलाहरुलाई चैत्र २७ गते मंगलबार व्यावसायिक तरकारी खेती तालिम प्रदान गरेको हो ।
विभिन्न समुहमा आवद्ध ३६ जना महिलाहरुलाई व्यवसायीक तरकारी खेतीको बारेमा तालिम प्रदान गरिएको मनहरिका शाखा प्रमुख सुरज दाहालले जानकारी दिए । तालिम लिएका महिलालाई व्यवसायीक रुपमा तरकारी खेती गर्नका लागि लघुवित्तले आवश्यक कर्जा प्रदान गरिरहेको पनि उनले भने ।
तालिम कार्यक्रममा मलको प्रयोजन, तरकारीमा लाग्ने रोग, बाली लगाउने तौर तरिका, बेमौसमी तरकारी बजारको माग अनुरुप उत्पादन व्यवस्थापन लगायतको बारेमा सहभागीहरुलाई जानकारी गराईएको थियो ।
व्यावसायिक तरकारी खेती तालिमको प्रशिक्षकमा मनहरि गाउँपालिकाका कृषि प्राविधिक शिव नारायण शाह रहेका थिए । शाखा प्रबन्धक सुरज दाहालको अध्यक्ष्यतामा संचालन भएको कार्यक्रमको सहजीकरण विकास कुमार माझिले गरेका थिए । तालिमको अन्त्यमा सम्पुर्ण सहभागीहरुलाई प्रमाणपत्र वितरण गरिएको थियो ।
