काठमाडौँ । नेकपा (एमाले)का सांसद ठाकुरप्रसाद गैरेले बिग्रिएका सरकारी गाडी तत्काल बेच्न माग गरेका छन् । प्रतिनिधि सभाको बैठकमा बोल्दै सांसद गैरेले थन्किएर बसेका सरकारी यातायातको साधनहरु तत्काल बिक्री वितरण गर्न सरकारसँग माग गरेका हुन् । 

उनले देशभर बिग्रिएर थन्किएका सवारी साधनहरुको तत्काल बिक्रीवितरण गरी त्यसबाट आउने रकमको सदुपयोग सम्बन्धी विशेष कार्यक्रम ल्याउन सरकारसँग माग गरेका छन् । 

‘सरकार कार्यालयमा दर्जनौँ गाडीहरु बेवारिसे अवस्थामा देखिन्छन् । त्यसले वातावरण प्रदुषण र सुन्दरतामा र अर्बौँको सम्पत्ति क्षति भइरहेको छ ।’, उनले भने, ‘देशभरी बिग्रेर बसेका यातायातका साधनहरु तत्काल मूल्यांकन गरी बिक्रीवितरण गरियोस् र त्यसबाट आउने रकमको सदुपयोग हुनेगरि एउटा विशेष कार्यक्रमको घोषणा गर्ने हिसाबले सरकारको प्रस्तुतिका लागि रुलिङ होस्, म माग गर्न चाहन्छु ।’

त्यस्तै, सांसद गैरेले वातावरणलाई प्रदुषित गर्ने ढंगले अर्वाैको सवारी साधनहरुलाई बेवारिसे अवस्थामा सरकारले राख्न नमिल्ने पनि बताएका छन् । सरकारी कार्यालयलाई बिग्रेर सवारी साधनहरु थन्क्याउने ठाउँको रुपमा विकास गर्न नहुने पनि सांसद गैरेले बताएका छन् ।