काठमाडौँ । धनगढीमा ट्राफिक प्रहरीको सक्रियता बढेको छ । खासगरी अस्थायी ट्राफिक प्रहरी पोष्ट फुलवारीको कमाण्ड फेरिएपछि धनगढीको ‘फुलवारी बेल्ट’मा ट्राफिक प्रहरीको सक्रियता बढेको हो ।
यहीबीच धनगढी-१९ बहुलियामा समाजसेवी, महिला तथा ज्येष्ठ नागरिकलाई पनि ट्राफिक नियमबारे प्रशिक्षण गरिएको अस्थायी ट्राफिक प्रहरी पोष्ट फुलवारीका इन्चार्ज तथा प्रहरी हवल्दार शिद्धराज विष्टले जानकारी दिएका छन् ।
विष्टका अनुसार ‘अभिभावकसँग ट्राफिक प्रहरी’ कार्यक्रम अन्तर्गत बुधबार वडाका अभिभावक, बुद्धिजीवी, महिला तथा ज्येष्ठ नागरिकलाई एकै ठाउँमा भेला गरेर प्रशिक्षण दिइएको हो । उक्त कार्यक्रममा अभिभावकहरुको उत्साहजनक उपस्थिति रहेको थियो ।
प्रशिक्षणका क्रममा उनीहरुलाई ट्राफिक नियम, सडक प्रयोग गर्दा ध्यान दिनुपर्ने कुरा, सवारी दुर्घटना हुने कारण तथा न्यूनिकरणका लागि अपनाउनुपर्ने उपाय र अभिभावकको भूमिकाका बारेमा जानकारी गराइएको थियो । उक्त कार्यक्रमले सडक दुर्घटना न्यूनिकरणमा महत्वपूर्ण भूमिका खेल्नेमा अभिभावकहरुलेसमेत विश्वास व्यक्त गरेका छन् ।
