काठमाडौँ । लुम्बिनी विकास कोषका पूर्वयोजना प्रमुख सरोज भट्टराईलाई ६ वर्ष कैद सजाय सुनाइएको छ । विशेष अदालतका अध्यक्ष टेकनारायण कुँवर, सदस्यद्वय तेजनारायणसिंह राई र रितेन्द्र थापाको इजलासले भ्रष्टाचार मुद्दामा दोषी ठहर गर्दै भट्टराईलाई ६ वर्ष कैद सजाय सुनाएको हो । 

भट्टराईविरुद्ध अख्तियार दुरुपयोग अनुसन्धान आयोगले गत चैत्र २५ गते भ्रष्टाचार मुद्दा दायर गरेको थियो । 

सोही मुद्दाको सुनुवाइ गर्दै अदालतले भट्टराईलाई दोषी ठहर गर्दै ६ वर्ष कैद सजाय सुनाएको छ । सँगै अदालतले उनीविरुद्ध ८० लाख रुपैयाँ जरिवाना निर्धारणसमेत गरेको छ ।

पदको दुरुपयोग गर्दै भट्टराईले कोषका ठेकेदारबाट ८० लाख रुपैयाँ भ्रष्टाचार गरेको र उक्त रकम जग्गामा लगानी गरेको पाइएपछि अख्तियारले भट्टराईमाथि अनुसन्धान थालेको थियो ।