काठमाडौँ । प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समितिले चुरोटमा प्रयोग हुने पदार्थहरुको उत्पादन, आयात तथा प्रयोगमा रोक लगाउन सरकारलाई निर्देशन दिएको छ ।
बिहीबार बसेको समितिको बैठकले सरकारलाई यस्तो निर्देशन दिएको हो ।
समितिले चुरोटमा प्रयोग हुने फ्लेभर, क्याप्सुल तथा नशालु पदार्थले मानव स्वास्थ्यमा गम्भीर असर पार्ने भन्दै नशालु पदार्थको उत्पादन, आयात तथा प्रयोगमा रोक लगाउन निर्देशन दिएको छ ।
समितिले दिएको निर्देशनकाबारेमा थप अध्ययन तथा छलफलपछि टुङ्गोमा पुग्ने उद्योग वाणिज्य तथा आपूर्ति मन्त्रालयका अधिकारीले बताएका छन् । ती अधिकारीका अनुसार समितिको निर्देशनबारे थप छलफल अघि बढाइएको छ ।
