सेयर बजारले यति बेला बढोत्तरीको लय समातेको छ । बिष्णु पौडेल अर्थमन्त्री भएको भोलिपल्ट देखि बढ्न थालेको बजार अविराम, अविरल बढोत्तरीकै यात्रामा छ । जताततै बुल बजारको चर्चा चुलिएको छ । बढोत्तरीपछिका उचाइका अपेक्षा र सम्भावनाका बीच बिन्दु भविष्यवाणीको प्रतिष्पर्धा नै चलिरहेको छ । आखिर बजारलय कता जाँदैछ ? के सेयर बजारमा बुलको सुरुवात भएको हो ? अबको बजार यात्रा कहाँसम्म पुग्ला ? लगायतका विषयमा अर्थ सरोकारकर्मी सुदर्शन श्रेष्ठले सेयर बजार विश्लेषक रामहरि नेपालसँग कुराकानी गरेका छन् । प्रस्तुत छ, सोही कुराकानीको सम्पादित अंश:

१. सेयर बजारमा बुलको सुरुवात भएको हो ? 
नेप्सेमा बुलको सुरुवात त धेरै अगाडिदेखि नै भएको हो । खासमा ‘एग्रेसिभ सेलिङ प्रेसर’ थामिनेबित्तिकै बुलको सुरुवात हुन्छ । अहिलेको बढोत्तरी त्यसैको नतिजा हो । तर, यसरी बजार बढ्नुको कारण भने राजनीतिक परिवर्तन र सेयर बजारको सम्बन्ध सकारात्मक हुनु हो । राजनीतिक परिवर्तनपछि सेयर बजारप्रति सकारात्मक दृष्टिकोण राख्ने पात्र आउनुले नै अहिले बजारमा खरिद प्रेसर बढाएको देखिन्छ । नीतिगत तहमा झट्ट हेर्दा हिजो जे थियो, आज पनि त्यही नीति छ । तर, अहिले सेयर बजारमा देखिएको पोजेटिभ साइकलले बजारलाई चलायमान बनाएको हो । अर्थात, बजार बढेपछि लगानीकर्तालाई सेयर किन्न मन लाग्ने र किनेपछि फेरी बजार बढ्ने साइकल अहिले सेयर बजारमा देखिएको छ, जुन बजारका लागि पोजेटिभ हो ।

२. अहिलेको बढोत्तरी कुन उचाइसम्म पुग्ने सम्भावना देखिन्छ ? 
यसपटक सेक्टर र स्टकका आधारमा फरक हुनेवाला छ । किनकी बजारको गिरावट थामिनका लागि केही सेक्टरमा ‘बुल’ आइसकेको थियो, जसको उदाहरणका लागि होटललाई लिँदा पनि हुन्छ । अर्कोतर्फ बजारलाई साइडवेजमा ल्याउन पनि केही सेक्टरमा ‘सेमी बुल’ आइसकेको थियो । तर, अहिले भने बजारलाई ‘लार्ज क्याप’ कम्पनीले मद्दत गरेको देखिन्छ । हाइड्रो केही सेलाएको छ, तर कमर्सियल बैंकको पोजेटिभ सेन्टिमेन्टले बजार थामेको छ । यो बढोत्तरी अझै केही समय रहने देखिन्छ तर बजार एकोहोरो चाहिँ बढ्दैन । 

३. एकोहोरो बढ्दैन भन्नुको अर्थ अहिलेको बजार घट्न पनि सक्छ भन्ने हो ?
बजार हो, एकोहोरो त बढ्दैन । तर, विगतमा २२०० को बिन्दुलाई ‘रेसिस्टेन्स’ भनिन्थ्यो भने, अहिले २२०० को बिन्दु ‘सपोर्ट’ हुनसक्छ । अर्कोतर्फ निकट भविष्यमा बजारमा ठूलै करेक्सन पनि देखिन सक्छ । जसलाई सेयर लगानीकर्ताले स्वभाविक, अपेक्षित र आवश्यकताका रुपमा लिनुपर्छ । 

४. लगानीकर्ताले ‘बुल’ सुरु भयो भनेर लगानी गर्ने कि के गर्ने ? 
सेयर बजारमा बढेको बेलामा किन्नुपर्छ र घटेको बेलामा बेच्नुपर्छ भन्नु नै गलत हो । इन्भेष्टरका लागि पहिला अवसर थियो । अबचाहिँ बजारमा देखिएको करेक्सनलाई नै अवसर मान्नुपर्ने अवस्था छ । तर, अहिले इन्भेष्टरमैत्रीबाट सेयर बजार ट्रेडरमैत्री बनेको छ । ट्रेडरका दिन आएका छन् । जसजसले सेयर किन्ने तरखर गर्दै हुनुहुन्छ, ट्रेडरको एंगलबाट किन्नुपर्यो । 

५. बैंकबाट कर्जा लिएर सेयर बजारमा लगानी गर्नु कत्तिको ठिक हुन्छ ? 
म चाहिँ सेयर बजारमा आक्रामक रुपमा कर्जा लिएर लगानी गर्नु हुँदैन भन्छु । तर, यदि तपाईंले एकल अंकको ब्याजमा कर्जा पाइरहनुभएको छ, कम्तीमा पनि ६ महिना वा १ वर्ष सेयर नबेची कर्जाको ब्याज तिर्ने क्षमता छ र कर्जाले तपाईंको परिवारको गास, बास, कपास, शिक्षा, स्वास्थ्यजस्ता खर्चमा असर गर्दैन भने कर्जा लिएर सेयर बजारमा लगानी गर्ने बेलाचाहिँ यही हो । 

६. यो बढोत्तरी कुन बिन्दुसम्म पुग्ला ? 
पहिला पनि बजारको बढोत्तरी २५०० को बिन्दुमा पुग्छ भन्ने सम्भावना देखिएको हो । सम्भवतः सोमबारको बजारले त्यो सम्भावनालाई पनि पछ्याउला । अब यो ‘बुल’ परिपक्व हुनका लागि एउटा राम्रो करेक्सन पनि आउन सक्छ । अब बजारमा आउने पहिलो ‘करेक्सन’को गरिहाइ हेरेर मात्रै बजार कहाँसम्म पुग्ला भनेर भन्न सकिन्छ । 

७. प्रधानमन्त्री, अर्थमन्त्री र गभर्नर सेयर बजारप्रति सकारात्मक हुनु र राम्रो मौद्रिक नीति आउँछ भन्ने अपेक्षाले पनि बजारलाई बल पुगेको हो ? 

पक्कै हो । सेयर बजारमा देखिएको पछिल्लो बढोत्तरीको मुख्य कारण नै यही हो ।