काठमाडौँ । गत आर्थिक वर्षमा बैंक तथा वित्तीय संस्थाहरुले ६ खर्ब बढी कर्जा घरजग्गा क्षेत्रमा प्रवाह गरेका छन् । नेपाल राष्ट्र बैंकको तथ्याङ्कअनुसार गत आर्थिक वर्ष २०८०/८१ मा बैंक तथा वित्तीय संस्थाहरुले घरजग्गा क्षेत्रमा कुल ६ खर्ब ४५ अर्ब ५९ करोड ४० लाख रुपैयाँ प्रवाह गरेका हुन् ।
गत आर्थिक वर्षमा घरजग्गा क्षेत्रमा प्रवाह भएको कर्जा अघिल्लो आर्थिक वर्ष २०७९/८० को तुलनामा ५० अर्ब १३ करोड रुपैयाँ बढी हो ।
अघिल्लो आर्थिक वर्षमा बैंक तथा वित्तीय संस्थाहरुले घरजग्गा क्षेत्रमा कुल ५ खर्ब ९५ अर्ब ४८ करोड ४० लाख रुपैयाँ कर्जा प्रवाह गरेका थिए । जसमध्ये व्यक्तिगत आवास शीर्षकमा ३ खर्ब ४९ अर्ब ३८ करोड ५० लाख र रियलस्टेटमा २ खर्ब ४६ अर्ब ९ करोड ९० लाख रुपैयाँ कर्जा प्रवाह भएको थियो ।
राष्ट्र बैंकको तथ्याङ्कअनुसार गत आर्थिक वर्षको सोही अवधिमा भने बैंक तथा वित्तीय संस्थाबाट घरजग्गा क्षेत्रमा प्रवाह भएको कर्जामध्ये ३ खर्ब ८४ अर्ब ४१ करोड २० लाख रुपैयाँ व्यक्तिगत आवास शीर्षकमा प्रवाह भएको छ भने रियलस्टेटमा २ खर्ब ६० अर्ब १८ करोड २० लाख रुपैयाँ कर्जा प्रवाह भएको छ ।
समीक्षा अवधिमा वाणिज्य बैंकहरुले मात्रै घरजग्गा क्षेत्रमा ५ खर्ब ३२ अर्ब २१ करोड ८० लाख रुपैयाँ कर्जा प्रवाह गरेका छन् ।
त्यस्तै, सोही अवधिमा विकास बैंकहरुले ९० अर्ब ३५ करोड ५० लाख रुपैयाँ घरजग्गा क्षेत्रमा लगानी गरेका छन् भने फाइनान्स कम्पनीहरुले कुल २३ अर्ब २ करोड १० लाख रुपैयाँ कर्जा घरजग्गा क्षेत्रमा प्रवाह गरेका छन् ।
