काठमाडौँ । शुक्रबार काठमाडौँमा सुरक्षा व्यवस्थामा कडाइ गरिएको छ । दुर्गा प्रसाईं समूह र नेकपा एमालेको आन्दोलनलाई लक्षित गर्दै सुरक्षा व्यवस्थामा कडाइ गरिएको हो ।
एमालेले आजको आन्दोलनलाई वर्तमान सरकारले गरेको कामको प्रचार र भ्रमलाई चिर्ने उद्देश्यले आयोजना गरिएको जागरण सभा भनेको छ । तर, यो सभालाई शक्ति प्रदर्शनका रुपमा हेरिएको छ ।
यता दुर्गा प्रसाईं समूहले भने शुक्रबारको आन्दोलनलाई मुक्तिको आन्दोलन भनेको छ । प्रसाईं समूहको आन्दोलन कोटेश्वर क्षेत्रमा हुने भनिएको छ भने एमालेको जनसभा दरबारमार्गमा हुने बताइएको छ ।
यी दुवै आन्दोलनलाई लक्षित गर्दै शुक्रबार बिहानैदेखि काठमाडौँमा सुरक्षा व्यवस्था कडा पारिएको छ । प्रदर्शन स्थलमा ठूलो संख्यामा प्रहरी परिचालन गरिएको छ भने भीड नियन्त्रण गर्न प्रयोग गरिने पानीको फोहोरा हान्ने ‘वाटर ट्यांक’ र एम्बुलेन्स स्ट्याण्डबाई अवस्थामा राखिएको छ ।
