काठमाडौँ । कृषि विकास बैंकका प्रबन्धक मृत फेला परेका छन् । बैंकको रुकुम पूर्वको सिस्ने गाउँपालिका–५ स्थित शाखामा कार्यरत प्रबन्धक शिवशंकर गिरी मृत फेला परेका हुन् ।
गिरी आफ्नै निवासमा मृत भेटिएको जिल्ला प्रहरी कार्यालय रुकुम पूर्वका प्रवक्ता तथा प्रहरी निरीक्षक लाल बहादुर विश्वकर्माले पुष्टि गरेका छन् ।
उनका अनुसार गिरी बैंक रहेकै भवनमा रहेको आफ्नै निजी क्वाटरमा अचेत अवस्थामा फेला परेका थिए । ‘सुरुमा खबर आयो । हामी पुग्दा उहाँ बेडमा अचेत अवस्थामा हुनुहुन्थ्यो ।’, अर्थ सरोकारसँग कुराकानी गर्दै उनले भने, ‘हामीले डाक्टरलाई बोलायौँ । उहाँको श्वासप्रश्वास बन्द भइसकेको थियो ।’
प्रहरी निरीक्षक विश्वकर्माका अनुसार गिरीको आफन्तलाई खबर गरिसकिएको छ भने हाल पोस्र्टमाटम गर्ने तयारी भइरहेको छ । गिरी सुगर र प्रेसरको बिरामी भएको विश्वकर्माले बताएका छन् ।
हालसम्म मृत्युको कारण भने खुलेको छैन । अहिले शवको पोस्टमार्टम गर्ने तयारी भइरहेको बताउँदै प्रहरी निरीक्षक विश्वकर्माले थप विवरण पोस्टमार्टम रिपोर्ट आएपछि मात्र थाहा हुने बताएका छन् ।
