काठमाडौँ । गत आर्थिक वर्ष २०८१/८२ मा सेयर धितो कर्जा ५६ प्रतिशतले बढेको छ । नेपाल राष्ट्र बैंकले जारी गरेको गत आर्थिक वर्षको वित्तीय रिपोर्ट अनुसार गत आर्थिक वर्षमा सेयर धितो कर्जा ५० अर्ब रुपैयाँले बढेको हो । गत आर्थिक वर्षको अन्त्यसम्म १ खर्ब ४० अर्ब ७० करोड रुपैयाँ सेयर धितो कर्जा प्रवाह भएको छ । जबकी अघिल्लो आर्थिक वर्षमा ९० अर्ब ९ करोड रुपैयाँ सेयर धितो कर्जा प्रवाह भएको थियो । 

राष्ट्र बैंकको रिपोर्ट अनुसार गत आर्थिक वर्षमा एक करोडमाथिको सेयर धितो कर्जा ७६.९ प्रतिशतले बढेको छ भने एक करोडमाथिको कर्जा ९८ अर्ब ९२ करोड प्रवाह भएको छ ।

त्यस्तै, ५० लाखदेखि १ करोडसम्मको कर्जा २९ प्रतिशतले बढेको छ भने २५ देखि ५० लाखसम्मको कर्जा २१.८ प्रतिशतले बढेर १७ अर्ब ५६ करोड पुगेको छ । त्यस्तै, २५ लाखमुनिका कर्जा ११.८ प्रतिशतले बढेर ८ अर्ब १७ करोड पुगेको छ ।

नेपाल राष्ट्र बैंकले गरेको व्यवस्था अनुसार बैंक तथा वित्तीय संस्थाले एक व्यक्तिलाई २५ करोडसम्म सेयर कर्जा प्रवाह गर्न पाउँछन् । संस्थागत लगानीकर्ताको हकमा भने यस्तो सीमा छैन ।