काठमाडौँ । काठमाडौँ उपत्यकामा चोरको बिगबिगी भएको छ । पछिल्लो केही महिनायता काठमाडौँमा चोरीका घटनाहरु बढेका हुन् ।
बुधबार मात्र उपत्यकाका दुई ठाउँमा ११ लाख बराबरको चोरी भएको घटना प्रहरीमा दर्ता भएको छ । प्रहरीका अनुसार काठमाडौँको तारकेश्वर नगरपालिका-१० मा राती ९ लाख बराबरको चोरी भएको हो ।
उदयरपुर घर भएका २९ वर्षीय बिक्रम लायो मगर तारकेश्वरमा डेरा गरी बस्दै आएका थिए । बुधबार राती उनको कोठाबाट सुनका विभिन्न गहना, नगद एक लाख ७० हजार गरी कुल ९ लाख ६ हजार रुपैयाँ बराबरको धनमान चोरी भएको प्रहरीले जनाएको छ ।
प्रहरीका अनुसार बुधबार दिउँसो नै ललितपुरमा पनि चोरी भएको घटना प्रहरीमा दर्ता भएको छ । ललितपुर महानगरपालिका-२५ खोकनामा मोहन कृष्ण महर्जनको पसलबाट दुई लाख रुपैयाँ चोरी भएको प्रहरीले जनाएको छ ।
