काठमाडौँ । नेपाल स्टक एक्सचेञ्ज (नेप्से)मा कर्मचारीहरु कालोपट्टी बाँधेर काम गरिरहेका छन् ।

अर्थ मन्त्रालयले सेवा सुविधा कटौती गर्ने निर्णय गरेपछि आक्रोशित बनेका नेप्सेका कर्मचारीहरु कालोपट्टी बाँधेर काम गरिरहेका हुन् । उनीहरुले आफ्ना माग पूरा नभएसम्म विरोध जनाइरहने बताएका छन् ।

हाल नेप्सेमा नेप्सेका प्रमुख कार्यकारी अधिकृत (सिइओ) र अध्यक्षलाई प्रवेश गर्न निषेध गरिएको छ ।

कार्यालयको मुल ढोका अगाडि नै सिइओ चुडामणी चापागाईं र अध्यक्ष हेमन्त बस्याललाई प्रवेश निषेधको पप्लेट टाँसिएको छ । कर्मचारीले अध्यक्ष र सिइओलाई कार्यालय छिर्न नदिने भनेपछि उनीहरु कार्यालय नै गएका छैनन् ।