काठमाडौँ । पूँजी बजार सुधारका लागि गठन गरिएको कार्यदलले अर्थमन्त्रीलाई अध्ययन प्रतिवेदन बुझाएको छ । बजारका समस्या, लगानीकर्ताका माग र तत्काल गर्नुपर्ने सुधारसहितको प्रतिवेदन कार्यदलले अर्थमन्त्री रामेश्वर खनाललाई बुझाएको हो ।
जेनजी आन्दोलनका कारण भदौ २४ गते बन्द भएको बजार खुलेको पहिलो दिन नै नेगेटिभ सर्किट लागेर बन्द भएको थियो । लगत्तै अर्थमन्त्री खनालले सो कार्यदल गठन गरेको थिए ।
उक्त कार्यदलले अर्थमन्त्रीलाई बुझाएको प्रतिवेदनमा सुझावको पहिलो बुँदामै सेयर धितो कर्जामा लगाइएको २५ करोडको क्याप हटाउनुपर्ने सुझाव दिइएको छ । कार्यदलले बैंक तथा वित्तीय संस्थाबाट सेयर धितोमा प्रवाह हुने मार्जिन प्रकृतिको कर्जाको अधिकतम एकल ग्राहक सीमा रु. २५ करोडलाई हटाउन सुझाव दिएको छ ।
धितोपत्र बोर्डका कामु कार्यकारी निर्देशक रुपेश केसीको संयोजकत्वमा गठन गरिएको चार सदस्यीय कार्यदलले लगानीकर्ताले दुई वा सो भन्दा बढी हितग्राही (डिम्याट) खाता खोल्न सक्ने व्यवस्था गर्न पनि सुझाव दिएको छ । त्यसबाहेक कार्यदलले तत्काल, मध्यम र दीर्घकालीन गरी कार्यान्वयन गर्नुपर्ने ३७ वटा सुझाव पेश गरेको छ ।
