काठमाडौँ । शिक्षामन्त्री महावीर पुनले कुहिएका नेताहरुलाई नफालेसम्म देशमा ठूलो परिवर्तन सम्भव नभएको बताएका छन् । सामाजिक सञ्जाल फेसबुकमा लेख्दै पुनले यस्तो बताएका हुन् ।
उनले आगामी निर्वाचनमार्फत स्वच्छ युवाहरुको बहुमतको सरकार बनाउन आग्रह गर्दै कुहिएका नेता नफालेसम्म ठूलो परिवर्तन सम्भव नभएको बताएका छन् । ‘कुहिएका नेताहरु फालेर स्वच्छ युवा नेताहरुको अत्याधिक बहुमतको सरकार बनाएसम्म ठूलो परिवर्तन सम्भव छैन ।’, उनले लेखेका छन् ।
त्यस्तै, शिक्षामन्त्री पुनले योग्य, नैतिकवान र दृढ संकल्प भएको युवा जनप्रतिनिधिहरु छान्न कत्ति पनि झैझगडा नगरी संगठित रुपमा चुनावमा भाग लिने तयारीमा तुरुन्त लाग्न पनि आह्वान गरेका छन् ।
मन्त्री पुनले सोही पोस्टमार्फत भ्रष्टाचारलाई सकेसम्म कम गरेर सारा जनतालाई सुशासन दिने सरकार बनोस्, नेपाल आर्थिक रुपमा सम्पन्न बनोस्, विदेशीहरुले चलखेल गर्न नपाउन् र प्रत्यक्ष राष्ट्रपति चुन्ने व्यवस्था आओस् भन्ने सपना देख्नेहरुलाई निर्वाचनका लागि तयार रहन पनि आग्रह गरेका छन् ।
