काठमाडौँ । सेयर विश्लेषक तथा चार्टर्ड एकाउन्टेन्ट मनिष अर्यालले नन लाइफ इन्स्योरेन्समा बाहिर चलेको हल्लाजस्तो असर नपरेको बताएका छन् । अर्थ सरोकारको टेलिभिजन कार्यक्रम ‘बजार विमर्ष’मा बोल्दै अर्यालले यस्तो बताएका हुन् ।
जेन-जी आन्दोलनका कारण इन्स्योरेन्स कम्पनीमा ठूलो दाबी पर्ने र त्यही कारण नन लाइफ इन्स्योरेन्सहरु मर्कामा पर्ने भन्दै चलाइएका हल्लामा सत्यता नभएको अर्यालको भनाई छ ।
‘यतिसम्म कि कुनै एउटा रि-इन्स्योरेन्स कम्पनीको नामै तोकेर होटलमा क्षति हुँदा ठूलो दायित्व पर्ने भयो भन्दै हल्ला गरियो । त्यही हल्लाले कम्पनीको सेयर मूल्य डेढ-दुई सय रुपैयाँ नै घट्यो ।’, अर्यालले भने, ‘तर अहिले दायित्व तिर्नु नपर्ने भनेपछि फेरि माहोल बनिरहेको छ ।’
लगानीकर्ताले वास्तविक अवस्थाको विश्लेषण नगरी हल्लाको पछि लाग्दा नन लाइफमा भविष्य नदेखेको अर्यालको दाबी छ । यद्यपि बजारमा चलाइएको हल्ला अनुसारको नन लाइफमा कुनै असर नरहेको पनि अर्यालले बताएका छन् । उनले हल्लाको नभएर स्वविवेक र वास्तविक अवस्थाको अध्ययन गरेर लगानी गर्न पनि आग्रह गरेका छन् ।
त्यस्तै, अर्यालले बजार बढ्नेमा लगानीकर्तालाई ढुक्क हुन पनि भनेका छन् । ‘अहिले धेरै लगानीकर्ता बजार घट्छ कि भनेर डराइरहेकोजस्तो देखिन्छ ।’, उनले भने, ‘डराउनुपर्दैन । बजार बढ्छ, ढुक्क हुनुस् ।’
प्रतिक्रिया दिनुहोस्