काठमाडौँ । कैलालीमा अत्याधिक चिसो बढेपछि सशस्त्र प्रहरीले ठाउँठाउँमा दाउरा वितरण गर्न थालेका छन् । चिसोका कारण दैनिक जीवन प्रभावित हुन थालेपछी सशस्त्र प्रहरीले आगो ताप्ने व्यवस्था गर्न दाउरा वितरण गरेका हुन् ।

यहीबीच कैलारी गाउँपालिका-३ स्थित सीमा सुरक्षा गुल्म खोनपुरले गाउँपालिकाका विभिन्न स्थानमा दाउरा वितरण गरेको छ ।

गुल्मका इन्चार्ज तथा सशस्त्र प्रहरी निरीक्षक गंगाधर मल्लको नेतृत्वमा ६ जना प्रहरी जवानको अगुवाइमा हसुलिया बजार क्षेत्र, शिवरत्नपुर, भितरीया, सुर्मिनाला, खोनपुर चोकमा दाउरा वितरण गरिएको हो ।

चोकचोक तथा सार्वजनिक स्थलमा दाउरा वितरण गरेपछि विद्यार्थी, तरकारी तथा खुद्रा व्यापार गर्ने व्यापारी, दुग्ध संकलन गर्न आउने व्यापारी तथा वृद्धवृद्धाहरु सोही दाउरा बालेर चोक चोकमा आगो ताप्न थालेका छन् । यसले अत्याधिक चिसो र सित लहरमा नागरिकका दैनिक जीवनमा केही सहज हुने विश्वास गरिएको छ ।