काठमाडौँ । नेपाल राष्ट्र बैंकले चालु आर्थिक वर्ष २०८२/८३ को मौद्रिक नीतिको अर्धवार्षिक समीक्षा सार्वजनिक गरेको छ । राष्ट्र बैंकले मंगलबार मौद्रिक नीतिको अर्धवार्षिक समीक्षा सार्वजनिक गरेको हो । 

मौद्रिक नीतिको अर्धवार्षिक समीक्षामार्फत राष्ट्र बैंकले सूचना प्रविधि (आईटी) उद्योगलाई विदेशमा लगानी गर्न पाउने सहज व्यवस्था गरेको छ । 

विदेशी लगानी तथा विदेशी ऋण व्यवस्थापनसम्बन्धी विनियमावली संशोधन गरी सूचना प्रविधि (आईटी) उद्योगलाई २० हजार अमेरिकी डलरसम्म विदेशमा लगानी गर्न पाउने व्यवस्था गरिएको राष्ट्र बैंकले जनाएको छ । 

त्यस्तै, मौद्रिक नीतिको समीक्षामार्फत राष्ट्र बैंकले ट्रष्ट रिसिट (आयात) कर्जाको जोखिम भार घटाएको छ भने कर्जा वर्गीकरण व्यवस्थामा सहजीकरण गरेको छ । साथै विदेशी ऋण भित्र्याउने र लगानीबाट आर्जित रकम फिर्ता लैजाने प्रक्रियामासमेत राष्ट्र बैंकले सहजीकरण गरेको छ ।