काठमाडौँ । विदेश पठाउने भन्दै रकम ठगी गर्ने दुई जना पक्राउ परेका छन् । बेरोजगार युवा युवतीलाई आकर्षक तलबको प्रलोभनमा पारेर रकम ठगी गर्ने दुई जनालाई प्रहरीले पक्राउ गरेको हो ।

पक्राउ पर्नेमा ललितपुर जिल्ला गोदावरी नगरपालिका वडा नं.  १२ घर भएका २५ वर्षीय आयुष कार्की र डोटीको आदर्श गाउँपालिका घर भई हाल काठमाडौँ बस्दै आएका २७ वर्षीय किरण ताम्राकार रहेका छन् । उनीहरुलाई काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले चैत २२ गते पक्राउ गरेको हो ।

प्रहरीका अनुसार कार्कीले सर्बिया पठाउने भन्दै एक जनाबाट १८ लाख ९० हजार रुपैयाँ र ताम्राकारले जर्जिया पठाउने भन्दै १ जनाबाट ३ लाख रुपैयाँ लिई सम्पर्क विहिन भएका थिए । पीडितले दिएको उजुरीका आधारमा उनीहरुलाई पक्राउ गरिएको प्रहरीले जनाएको छ ।

हाल पक्राउ परेका दुवै जनालाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको छ ।