काठमाडौँ । सोमबार सेयर बजार मापक नेप्से परिसूचक बढेको छ । आज नेप्से परिसूचक ३८.१९ अंकले बढेर २७८३.८५ बिन्दुमा पुगेको हो ।

नेप्सेमा कुल ३३२ कम्पनीको एक करोड ४ लाख ३९ हजार ४ सय ३२ कित्ता सेयर खरिद बिक्री हुँदा ४ अर्ब ६१ करोडमाथिको सेयर कारोबार भएको छ । आज सबैभन्दा धेरै कारोबार रिलायन्स स्पिनिङस मिल्सको भएको छ । यस कम्पनीको २१ करोड ११ लाख रुपैयाँ बराबरको कारोबार भएको छ ।

त्यस्तै, आजको बजारमा फिर्स्ट माइक्रो फाइनान्स लघुवित्त वित्तीय संस्थाका लगानीकर्ताले सबैभन्दा धेरै नाफा कमाएका छन् । यस कम्पनीको सेयर मूल्य १४ प्रतिशतभन्दा धेरैले बढेको छ ।

यता, त्रिशुली जल विद्युत कम्पनीका लगानीकर्ताले भने सबैभन्दा धेरै गुमाएका छन् । यस कम्पनीको सेयर मूल्य २ प्रतिशतभन्दा धेरैले घटेको छ ।