काठमाडौँ । अमेरिका पठाइदिने भन्दै ठगी गर्ने महिला पक्राउ परेकी छिन् । रोजगारीको लोभ देखाएर अमेरिका पठाइदिन्छु भन्दै ठगी गरेको आरोपमा निर्मला कुमारी श्रेष्ठ पक्राउ परेकी हुन् । 

रोल्पा घर भएर हाल काठमाडौँको चन्द्रागिरी नगरपालिका-४ बस्दै आएकी श्रेष्ठलाई प्रहरीले बुधबार पक्राउ गरेको हो । 

अमेरिका पठाउने भन्दै एकजना पीडितबाट ३८ लाख ५० हजार रुपैयाँ लिएर सम्पर्कविहीन भएको भन्ने उजुरीका आधारमा श्रेष्ठलाई काठमाडौँ महानगरपालिका-१२ टेकुबाट पक्राउ गरिएको काठमाडौँ उपत्यका अपराध अनुसन्धान कार्यालयले जनाएको छ । 

पक्राउ परेकी श्रेष्ठलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।