काठमाडौँ । स्याङ्जाको अर्जुनचौपारी गाउँपालिकाले चालक तथा सहचालकलाई १० लाख रुपैयाँसम्मको दुर्घटना बीमा गरिदिने भएको छ । गाउँपालिकाले गाउँपालिका क्षेत्रभित्र पेशागत रुपमा सवारी सञ्चालन गर्दै आएका चालक तथा सहचालकलाई १० लाख रुपैयाँसम्मको दुर्घटना बीमा सुविधा उपलब्ध गराउने भएको हो । 

त्यसका लागि गाउँपालिकाले वार्षिक नीति तथा कार्यक्रममा सार्वजनिक तथा निजी सवारी साधनका चालक तथा सहचालकलाई लक्षित गर्दै दुर्घटना बीमा कार्यक्रम समावेश गरेको छ ।

नीति तथा कार्यक्रममा समावेश गरिएको उक्त कार्यक्रम अन्तर्गत गाउँपालिकाले जिप, टेम्पो, ट्याक्टर, बस तथा टिपरमा कार्यरत चालक र सहचालकका लागि १० लाखसम्मको दुर्घटना बीमा सुविधा उपलब्ध गराइनेछ ।

त्यसका लागि गाउँपालिका भित्र सवारी सञ्चालन गर्दै आएका चालक तथा सहचालकलाई ७ दिनभित्र आवश्यक कागजातसहित निवेदन दिन आग्रह गरिएको छ । उक्त कार्यक्रमले दुर्घटनाका कारण परिवारमा पर्न सक्ने आर्थिक भार कम गर्न सहयोग पुग्ने विश्वास गरिएको छ ।