काठमाडौँ । केएफसीमा ग्राहकहरुको फ्लो घटेको छ । चिकेन पारखीहरुका लागि चर्चित केएफसीमा पछिल्लो केही दिनदेखि ग्राहकहरुको फ्लो घटेको हो ।

काठमाडौँमा बर्डफ्लुको संक्रमण बढेपछि केएफसीमा ग्राहकहरुको फ्लो घटेको हो । हाल पशुसेवा विभागले बर्डफ्लु संक्रमण भएका कुखुरा, हाँस, बट्टाईलगायत पन्छी बिक्रीवितरणमा रोक लगाएको छ । 

त्यसका बाबजुत पनि संक्रमण भएका कुखुरा, हाँस, बट्टाईलगायत पन्छी बिक्री वितरण गरे सम्बन्धित व्यवसायीलाई कारवाही गर्ने चेतावनी समेत दिएको छ । 

ब्रोइलर लगायतका कुखुरामा संक्रमण पुष्टि भएपछि अहिले कुखुराको मासु खानेहरु पनि घटेका छन् । यही कारण ब्रान्डिङ र बिक्रीवितरणमा आक्रामक बनेको केएफसीमा ग्राहकको फ्लो एकाएक कम भएको छ ।

बर्डफ्लुको संक्रमण फेला परेपछि ग्राहकको फ्लो कम भएको स्वयम् केएफसीका कर्मचारीहरुले स्वीकारेका छन् । ‘अहिले ग्राहकको फ्लो पहिलेको भन्दा घटेको छ ।’, केएफसीका एक कर्मचारीले भने, ‘खासगरी कुखुराहरुमा बर्डफ्लु संक्रमण देखिएपछि ग्राहकको फ्लो घटेको हो । ग्राहकको फ्लो घटेसँगै अहिले व्यापार पनि घटेको छ ।’

हाल काठमाडौँ, ललितपुर, भक्तपुर, काभ्रेपलाञ्चोक, झापा, मोरङ, सुनसरी, महोत्तरी, बारा, चितवन र नवलपरासी लगायतका क्षेत्रमा बर्डफ्लुको संक्रमण फेला परेको छ ।