काठमाडौँ । नेपाल पूँजीबजार लगानीकर्ता संघले धितोपत्र बोर्डका नवनियुक्त अध्यक्ष डा. गोपाल भट्टलाई बधाई दिएका छन् । बोर्डको कार्यालयमै पुगेर संघका अध्यक्ष एसपी चौलागाईंसहितको टोलीले बोर्ड अध्यक्षलाई बधाई तथा सफल कार्यकालको शुभकामना दिएको हो । 

शुभकामना दिँदै संघले भट्टको नेतृत्वमा पूँजी बजार सुधार, नीतिगत स्थायित्व र लगानीकर्ताले विश्वास बढाउने काम प्रभावकारी रुपमा अघि बढ्ने अपेक्षा समेत व्यक्त गरेको छ । 

त्यस्तै, संघले नियामकका रुपमा धितोपत्र बोर्डको भूमिका अझै प्रभावकारी, सक्रिय र दूरदर्शी हुनुपर्नेमा जोड दिएको छ । बजारलाई अझै पारदर्शी, प्रतिस्पर्धी, विश्वसनीय, प्रविधिमैत्री र अन्तराष्ट्रिय मापदण्डअनुसार विकास गर्न सक्षम नेतृत्वको आवश्यकता रहेको पनि संघले उल्लेख गरेको छ ।

योसँगै संघले बोर्डका नवनियुक्त अध्यक्षलाई सेयर बजारलाई सेयर कारोबार गर्ने माध्यम मात्र नभएर राष्ट्रिय बचत उत्पादनशील क्षेत्रमा परिचालन गर्ने, उद्योग-व्यवसायका लागि दीर्घकालीन वित्तीय स्रोत सुनिश्चित गर्ने र आर्थिक विकासलाई गति दिने महत्वपूर्ण वित्तीय पूर्वाधारका रुपमा विस्तार गर्नेगरी काम गर्न पनि सुझाव दिएको छ ।