काठमाडौँ । नेपाल धितोपत्र बोर्ड (सेबोन)ले तीन ब्रोकर कम्पनीलाई कारवाही गरेको छ । सम्पत्ति शुद्धीकरण सम्बन्धी व्यवस्था उल्लंघन गरेको भन्दै बोर्डले तीन ब्रोकर कम्पनीलाई कारवाही गरेको हो ।

बोर्डको कारवाहीमा पर्नेमा सिप्ला सेक्युरिजिट (ब्रोकर नम्बर २०), कृष्ण सेक्युरिटिज (ब्रोकर नम्बर २८) र हातेमालो फाइनान्सियल सर्भिसेज (ब्रोकर नम्बर ७२) रहेका छन् ।

यी कम्पनीले सम्पत्ति शुद्धीकरण (मनी लाउण्डरिङ्ग) निवारण ऐन, २०६४ को दफा ७ (क) को उपदफा ४ को खण्ड (घ) र दफा ७ (ग) को व्यवस्था उल्लंघन गरेपछि कारवाही गरिएको बोर्डले जनाएको छ । 

बोर्डका अनुसार कारवाहीस्वरुप सिप्लालाई ५० लाख रुपैयाँ र कृष्ण सेक्युरिटिज र हातेमालो फाइनान्सियल सर्भिसेजलाई ३०-३० लाख रुपैयाँ आर्थिक जरिवाना तिराइएको छ । यी तीनवटै ब्रोकरलाई मनी लाउण्डरिङ्ग निवारण ऐन अनुसार कारवाही गरिएको बोर्डले जनाएको छ ।