काठमाडौँ । ‘होम सर्भिस’ भन्दै सामाजिक सञ्जालमा व्यापक प्रचार गर्ने ‘सजिलो सेवा’माथि ठगीको आरोप लागेको छ । अनलाइन प्लेटफर्मलाई ‘बेस’ बनाएर ‘बेस्ट सर्भिस’ दिने दाबी गर्ने सजिलो सेवामाथि ठगीको आरोप लागेको हो । 

नयाँ पेजका सम्पादक समेत रहेका राजेश राईले सजिलो सेवामाथि ठगीको आरोप लगाएका हुन् ।

उनका अनुसार घर वा अफिसमा कुनै सामान बिग्रिएर फोन गरे सजिलो सेवाले घर वा अफिसमै आएर बिग्रिएको सामान लैजान्छन् र बनाएर फेरि ल्याइदिन्छन् । तर, यहीबीचमा सजिलो सेवाले ठगी गर्ने राईको आरोप छ ।

सजिलो सेवामार्फत आएका कर्मचारीले सुरुमा ‘१५ सयमा बन्छ’ भनेर लगेको सामानमा पछि पार्टपुर्जा नै फेरियो भन्दै बढी पैसा असुली गर्ने गरेको राईले आरोप लगाएका छन् । 

तर, बढी पैसा तिरेर पार्टपुर्जा फेरिपछि पनि केही समयमै त्यही सामान बिग्रिने गरेको राईको भनाई छ । त्यसपछि फेरि ‘यो पार्ट फेर्नुपर्छ’ भन्दै पैसा मागेर ग्राहकलाई पटक-पटक खर्च गराएर सजिलो सेवाले ठगी गरेको राईले बताएका छन् । 

सामाजिक सञ्जाल फेसबुकमा राईले लेखेका छन्- ‘मेरो प्रिन्टर बिग्रियो सजिलो सेवामा फोन गरेँ। सुरुमा हेरेर १ हजार ५ सय रुपैयाँमा बनाएर ल्याइदिन्छु भन्यो । पछि फोन गरेर ‘मदरबोर्ड गएको रहेछ, ९ हजार रुपैयाँ लाग्छ’ भन्यो । हुन्छ भनेपछि प्रिन्टर बनाएर अफिसमै ल्याइदियो । तर अफिसमा ल्याएको एक घण्टा नबित्दै फेरि प्रिन्टर बिग्रियो । त्यसपछि बन्छ कि बन्दैन ? भनेर दर्जनौँ पटक फोन गरेँ। कहिले कुनै स्टाफ फोन उठाउँछन्, कहिले अर्कै। एक जनाले अर्कोलाई देखाउने, तर समस्या समाधान गर्ने जिम्मेवारी कसैले नलिने ।’