काठमाडौँ । बुढानीलकण्ठमा चिनियाँ तस्करले भाडामा लिएको घरका घरधनी नेपालमै नभएको पाइएको छ । चिनियाँ तस्करहरुले भाडामा लिएर बसेको अढाई तले घरका घरधनी अमेरिका बस्ने व्यक्तिको भएको पाइएको हो । 

उक्त घर विष्ट थर भएका व्यक्तिको भएको पनि खुलेको छ । तर, घरधनीको परिचय भने खुलाइएको छैन । 

सो घर चिनियाँ नागरिकले गत साउनदेखि भाडामा लिएको प्रहरी अनुसन्धानबाट खुलेको छ । प्रहरी स्रोतका अनुसार चिनियाँ नागरिकको सो घरको मासिक ३ लाख ३० हजार रुपैयाँ भाडा तिर्दै आएका थिए । यद्यपि ४ महिनाको भाडा घरधनीलाई अग्रिम भुक्तानी गरिसकेको पनि खुलेको छ । 

अवैध रुपमा तस्करी गरिएको सुन भण्डारण गरिएको भन्ने सूचनाका आधारमा प्रहरीले बिहीबार साँझ सो घरमा छापा मारेको थियो । 

सोही क्रममा प्रहरीले ३ जना चिनियाँ नागरिकलाई पक्राउ गरेको छ । उनीहरुको साथबाट प्रहरीले २१ किलो सुन, सुन गाल्ने र गुणस्तर परीक्षण गर्ने मेसिन तथा गालेको सुनलाई विभिन्न आकार दिने मेसिन समेत बरामद गरेको छ ।