काठमाडौँ । प्रकृतिको सुन्दरता, मस्ती र मदिरा । पोखरा घुम्न चाहाने पर्यटकले प्राय: रमाइलो गर्ने चीज यिनै हुन् । दिनभर प्रकृतिको काखमा लुटपुटिएर आनन्द लिएपछिको पोखराको ‘नाइट लाइफ’को मज्जा लिनकै लागि पोखरा आउनेहरुको संख्या पनि ठुलो छ । तर आजकल पोखराको ‘त्यो रमाइलो क्रेज’ कोरोनाले निलेको छ । दिउँसो पर्यटक नभेटिने पोखरामा रातमा पनि खास उल्लास छैन । क्लबहरु सुनसान छन् । रेष्टुरेन्टहरुमा भीड छैन । होटलहरु खाली छन् । व्यवसायीहरु फुर्सदिला छन् ।
विश्वभरि फैलिएको नोभेल कोरोना भाइरसको आतंकसँगै बन्द भएको पर्यटक आवागमनका कारण पोखरामा विदेशीहरुको चहल पहल घटेको छ । सधैंजसो भ्याई नभ्याई हुने पोखराका गाइडहरु यतिबेला फुर्सदीला छन् । पछिल्लो समय कोरोनाको त्रासका कारण ८० प्रतिशत व्यापारमा गिरावट आएको छ ।
कुनै बेला पोखरा रातभर जम्थ्यो । रातभर व्यवसाय गर्न दिनुपर्यो भनेर पोखराका व्यवसायीहरु लविङ गरिरहेका हुन्थे । तर अहिले गाह्रो छ पोखरामा । पर्यटक छैनन् । पर्यटक नभएपछि रातमा रौनक छैन । अहँ जम्दैन पोखरा । रातमा पोखरा कस्तो देखिन्छ भनेर हेर्न हिडियो भने स्थिति उदेक लाग्दो छ । बस् काला तस्विरहरुमा कुनै रंग छैन ।
