- अर्थ सरोकार सम्बाददाता
काठमाडौँ । नेपाल राष्ट्र बैंकले बैंक तथा वित्तीय संस्थामा १ अर्ब ५ करोड बराबरको रकम मुद्दती निक्षेपमा लगानी गर्ने भएको छ। राष्ट्र बैंकले एक सूचना प्रकाशित गर्दै बैंकको कर्मचारी उपदान तथा पेन्सन कोषमा रहेको रकम लगानी गर्न लागेको जानकारी दिएको हो ।
राष्ट्र बैंकले तोकिएको शर्त पूरा गरेका बैंक तथा वित्तीय संस्थालाई आवेदन गर्न आह्वान गरेको छ । २०७८ असार २१ गतेदेखि २०७९ असार २१ गतेसम्म उक्त परिमाणको रकम मुद्दती खातामा राख्न लागेको हो । ‘क’ वर्गका वाणिज्य बैंकमा ८४ करोड, ‘ख’ वर्गका राष्ट्रियस्तरका विकास बैंकमा १५ करोड ७५ लाख र ‘ग’ वर्गका राष्ट्रियस्तरका वित्त कम्पनीमा ५ करोड २५ लाख रुपैंयाँ लगानी राष्ट्र बैंकले गर्नेछ।
यसका लागि बैंकहरुले चाहेको रकम र रकमका लागि प्रस्ताव गरिएको ब्याजदरसमेत खुलाई असार ९ गते दिउँसो ५ बजेभित्र पेश गर्नुपर्नेछ ।
