नेपालको पूर्वी क्षेत्रमा उत्कृष्ट तथा गुणस्तरिय सेवा प्रदान गर्दै आइरहेको मकालु यातायातको टिकट अबदेखि अनलाइनबाट काट्न सकिने भएको छ । प्रविधिको बढ्दो प्रयोगसँगै यात्रुमानुभावहरूलाई टिकट काट्न सहज होस् भन्ने उदेश्यले माउन्ट मकालु यातायात प्रा.लि.ले बससेवा डटकमसँगको सहकार्यमा अनलाइन टिकट काट्न सकिने सेवा सुरू गरेको हो । अनलाइन टिकटिङ सेवासँगै अबदेखि पूर्वी नेपालका झापा, मोरङको बिराटनगर, धरान, ताप्लेजुङ, जनकपुर लगायतका क्षेत्रमा अनलाइनबाटै टिकट काटेर यात्रा गर्न सकिनेछ ।
कम्पनीले राजधानीमा एक कार्यक्रमको आयोजना गरी अनलाइन टिकटिङ सेवाको औपचारिक सुरूवात गरेको हो । कार्यक्रममा माउन्ट मकालु यातायात प्रा.लि.का अध्यक्ष तुलसी मान सिंहले भन्नुभयो ‘ विश्वमा मात्र नभएर नेपालमा पनि अहिले प्रविधिको प्रयोग बढिरहेको छ । हरेक क्षेत्र प्रविधिको प्रयोग गरेर अगाडी बढिरहेका बेला यातायात क्षेत्रलाई पनि प्रविधि मैत्री बनाइ यात्रुलाई सहजता प्रदान गर्नुपर्छ भन्ने उदेश्यले हामीले अनलाइन टिकटिङको सेवा सुरू गरेका हौँ’ ।
कार्यक्रममा बससेवा डटकमका प्रमुख कार्यकारी अधिकृत पि.आर खनालले भन्नुभयो,‘ हामीले नेपालको यातायात क्षेत्रलाई डिजिटलाइज बनाउनुपर्छ भन्ने उदेश्यले करिब चार वर्ष अगाडी बससेवा डटकमको स्थापना गरेका थियौँ । यहि क्रममा पूर्वी नेपालमा उत्कृष्ट र गुणस्तरिय सेवा प्रदान गर्दै आइरहेको मकालु यातायातसँग सहकार्य गर्न पाउँदा हामी निकै खुसी छौँ । यातायात क्षेत्रलाई डिजिटलाइज बनाउने हाम्रो अभियानमा मकालुसँगको सहकार्यले महत्वपूर्ण सहयोग पुग्छ भन्ने हाम्रो विश्वास रहेको छ ।
यात्रुहरूले माउन्ट मकालु यातायातको आधिकारिक वेभसाइट माउन्ट मकालु डटकम (www.mountmakalu.com) अथवा बससेवाको वेभसाइट बससेवा डटकम (www.bussewa.com) तथा बससेवाको मोबाईल एप्सबाट सिधै टिकट काट्न सक्नेछन् । यसैगरी इसेवाको वेभसाइट तथा मोबाईल एप्लिकेशनबाट समेत टिकट काट्न सकिनेछ । इसेवा एकाउन्ट नभएका यात्रुले आफ्नो टोलछिमेकमा रहेका इसेवाका जोन तथा पोइन्टबाट टिकट काट्न सकिनेछ । साथै निकट भविष्यमा आइएमइ पे, इप्रभु तथा एनआइसी एसिया बैंकमार्फत् समेत टिकट काट्न सकिनेछ ।
करिब २२ वर्ष अगाडी स्थापना भएको माउन्ट मकालु यातायात प्रा.लि. पूर्वी नेपालमा यात्रुहरुको पहिलो रोजाइको यातायात कम्पनी बन्न सफल भएको छ । यो अविधसम्म ५० लाख भन्दा बढि यात्रुलाई सेवा प्रदान गरिसकेकोे यो यातायात कम्पनीले समय र यात्रुको मागसँगै डिलक्स र एसी गाडी मार्फत सेवा प्रदान गर्दै आइरहेको छ ।
बससेवा डटकम नेपालको एकमात्र अनलाइन बस टिकटिङ माध्यम हो । बससेवाले नेपालभरका एसी, डिलक्स्, हाइस लगायतका बस टिकट उपलब्ध गराउनुका साथै बस रिजर्भेसन समेत अनलाइनबाटै गर्दै आएको छ ।
