आरएसडीसी लघुवित्त वित्तीय संस्था लिमिटेडका सेयरधनीले १५ प्रतिशत बोनस सेयर पाउने भएका छन् । संस्थाको शनिबार बुटवलमा सम्पन्न तेस्रो वार्षिक साधारणसभाले हाल कायम चुक्तापुँजीको १५ प्रतिशत बोनस सेयर जारी गर्ने निर्णय पारित गरेको हो । 

आरएसडीसीले ०७५ असार मसान्तसम्ममा ६० करोड रुपैयाँ चुक्तापुँजी पुर्याउनका लागि यो निर्णय गरेको जनाएको छ । यसबाहेक, संस्थाले बोनस सेयर जारी गरेपछि कायम चुक्तापुँजीको दुई सय प्रतिशत अर्थात एक बराबर दुईको अनुपातमा हकप्रद सेयर निष्काशन गर्ने भएको छ । यो निर्णय पनि साधारणसभाबाट पारित भएको बताइएको छ । 

साधारणसभाको अवसरमा सञ्चालक समितिको तर्फबाट आर्थिक वर्षका २०७२।०७३को वार्षिक प्रतिवेदन प्रस्तुत गरिएको थियो । सोही साधारणसभाले सर्वसाधारण सेयरधनीहरुको प्रतिनिधित्व गर्ने राजेन्द्र पन्त, शान्ति प्रसाद उप्रेती तथा डंगोल महर्जनलाई सञ्चालक समितिमा निर्विरोध निर्वाचित गरेको छ ।