भैरहवा – एमाले अध्यक्ष केपी ओलीले केटाकेटीलाई चकलेट बाँडेजस्तै विदेशी नागरिकलाई नागरिकता बाँड्न नसकिने बताएका छन् । मेची–महाकाली अभियानअन्तर्गत आइतबार भैरहवाको अञ्चलापुरमा आयोजित बृहत् आमसभालाई सम्बोधन गर्दै ओलीले त्यस्तो बताएका हुन् । 

‘उहिले–उहिले रानीको जन्मदिनमा केटाकेटी जम्मा पारेर चकलेट बाँडिन्थ्यो । नागरिकता त्यसरी सीमामा अरू देशका मानिस जम्मा गरेर बाँड्न सकिन्न,’ ओलीले भने, ‘१३ जना बुहारी नेपालको सांसद हुनुहुन्छ, एकजना बुहारी त मन्त्री हुनुहुन्छ, कांग्रेसको ठूलै नेता हुनुहुन्छ, ज्वाइँहरूको त कुरै नगरौँ । मन्त्री हुन पाँच वर्ष पनि पुग्नु नपर्ने प्रस्ताव मानिन्न ।’ नेपाली चेलीले भारतमा बिहे गरेमा सात वर्ष कुर्नुपर्ने संवैधानिक प्रावधान रहेको भन्दै ओलीले बिहे गरेकै भोलिपल्ट कोही पनि विदेशीलाई नागरिकता बाँड्न नसकिने स्पष्ट पारे । आजको नयाँ पत्रिकामा खबर छ ।

नेपाललाई कमजोर पार्ने षड्यन्त्रअन्तर्गत संविधान संशोधन प्रस्ताव अघि बढाइएको दाबी गर्दै ओलीले कुनै हालतमा पारित हुन नदिइने समेत स्पष्ट पारे । ‘संविधान संशोधनको प्रस्ताव देशहित र जनताका विरुद्धमा छ । सर्वोच्च अदालतले पनि असंवैधानिक भनेको छ । तर, यो सरकार नेपाली नागरिकको होइन, अरूकै कुरा सुन्छ । म स्पष्ट पार्न चाहन्छु, एमालेले यो प्रस्ताव कुनै हालतमा पारित हुन दिँदैन,’ ओलीले भने ।

ओलीले किस्ता–किस्तामा तराई र पहाडलाई अलग गर्ने षड्यन्त्र भइरहेको दाबी गरे । ‘संविधान संशोधन प्रस्तावले सबैभन्दा पहिला ५ नम्बर प्रदेशलाई टोक्न खोज्यो, त्यसपछि बाँकीलाई पनि यसरी नै टोक्ने योजना छ । ५ नम्बरका जनताले त्यसलाई अस्वीकार गरिदिएका छन्,’ उनले भने । वर्तमान सरकारले मुलुकको हितमा काम गर्न नसकेको आरोप लगाउँदै उनले राष्ट्रियताका विषयमा अडान राख्न नसक्ने सरकार कुर्सीमा बस्नुको कुनै औचित्य नहुने दाबी पनि गरे ।

एमाले मधेस पस्दा समाप्त हुने भयले मधेसी मोर्चाले अवरोध गरेको उनको आरोप छ । ‘एमालेले बोकेका नीतिहरू मधेसका जनताले थाहा पाए भने आफ्नो सटर बन्द हुन्छ भनेर मोर्चाका नेताहरू छट्पटिएका छन् । उनीहरूलाई देशको झन्डा र नाम नै मन पर्दैन,’ ओलीले भने, ‘विगतको संविधानसभामा तिनीहरूले यो कुरा उठाएका थिए । अहिले जनताले दण्डित गरेका छन्, हराइदिएका छन् ।’

विरोधमा बासामा कालो झन्डा

सुण्ड–मुसुण्डलाई जनताले तह लगाउँछन् : खनाल