काठमाडौं – नेकपा एमालेका नेता शंकर पोखरेलविरुद्ध संघीय समाजवादी फोरम नेपालको युवा संगठनले प्रहरीमा जाहेरी दिने भएको छ । मंगलबार विवादस्पद ट्वीट गरेका पोखरेल विरुद्ध विद्युतीय कारोबार ऐन अन्तरगत मुद्दा दर्ता गरिने पार्टीले बताएको छ ।

समाजवादी युवा फोरमका उपमहासचिव दुर्गा सुवेदीको नेतृत्वमा संगठनले महानगरी प्रहरी परिसर टेकुमा आज जाहेरी दर्ता गरिने भएको हो ।

नेता पोखरेलले मधेसी मोर्चाले असोज ३ लाई कालो दिन भनेर मनाउने निर्णय गरेको प्रति व्यंग्य गर्दै सामाजिक सञ्जाल ट्वीटरमा ट्वीट गरेका थिए । तर, उक्त ट्वीटले मधेसी जनताको भावनामा ठेस पुर्याएको भन्दै उनको ब्यापक आलोचना भएको थियो ।

पोखरेलले भने आफ्नो मधेसी जनताको भावनामा ठेस पुर्याउने कुनै उद्देश्य नरहेको तर आफ्नो ट्वीटलाई गलत रुपमा अर्थाएको प्रष्टिकरण दिएका थिए । आलोचनापछि पोखरेलले उक्त ट्वीट हटाएका थिए ।