• अर्थ सरोकार सम्बाददाता

काठमाडौं । कामना सेवा विकास बैंकले बिक्री खुला गरेको ऋणपत्रमा आवेदन दिने समय थप गरेको छ । अब उक्त ऋणपत्रमा आवेदन फागुन ६ गतेसम्म दिन सकिने भएको छ । यसअघि बैंकले माघ २६ गते सोमबारसम्म आवेदन दिन सकिने जनाएको थियो । तर सो समयमा माग अनुसारको आवेदन नपरेपछि फागुन ६ गतेसम्मका लागि आवेदन दिने समय थप गरेको हो ।

यस्तै बैंकले थप गरिएको समय अगावै मागभन्दा बढी आवेदन परेमा बन्द गरिने पनि जनाएको छ । बैंकले माघ २२ गतेदेखि १ अर्ब रुपैयाँ बराबरको १० लाख इकाई ऋणपत्र निष्कासन गरेको हो । यसमध्ये ४ लाख इकाईमा सर्वसाधारण लगानीकर्ताले आवेदन दिन सक्ने भएका छन् । बाँकी ६ लाख इकाई भने बैंकले आफ्नै पहलमा अन्य संघसंस्थाहरुलाई बिक्री गर्ने भएको छ । यस ऋणपत्रमा वार्षिक ९.५ प्रतिशत ब्याज पाइने भएको छ ।

बैंकले १० वर्ष अवधिको ‘कामना सेवा विकास बैंक डिबेन्चर २०८७ ’ नाममा ऋणपत्र बिक्री खुला गरेको हो । ऋणपत्रमा प्रतिइकाई १ हजार रुपैयाँको दरले आवेदन दिनुपर्नेछ । न्यूनतम २५ कित्तादेखि अधिकतम २० हजार कित्तासम्म भर्न पाइनेछ । यस ऋणपत्रमा सी-आस्वा प्राप्त बैंक तथा वित्तीय संस्थाबाट पनि आवेदन दिन सकिनेछ । ऋणपत्र बिक्री प्रबन्धकमा एनआइबीएल एस क्यपिटल लिमिटेड रहेको छ ।