समाजमा भएका विकृतिलाई दर्शकमाझ पुर्याउने दावी गर्ने टेलिभिजनले आफैं भने अरुको सम्पत्तिमाथि हमला गरेको छ । सरकारले यो गरेन र त्यो गरेन भनेर कहिले नथाक्ने टिभीले आफु भने एउटा फुटेज खिच्न नसकेर अरुको सम्पत्ति माथि धावा बोलेको छ । काठमाडौँबाट प्रशारण हुने टेलिभिजन हिमालय टेलिभिजनले सिए सरोकारको सम्पत्ति चोरेको छ । टेलिभिजनले केहि दिन अगाडी प्रशारण गरेको कार्यक्रम प्राइम स्टोरीमा सिए सरोकार टेलिभिजन कार्यक्रमका फुटेजहरु कार्यक्रम निर्माण कम्पनीको अनुमति बिना चोरेर प्रयोग गरेको छ ।
कुल ११ मिनेट २० सेकेन्डको कार्यक्रममा अधिकांस फुटेज सिए सरोकार टेलिभिजन कार्यक्रमको चोरी गरिएको छ । सिए सरोकार टेलिभिजन कार्यक्रमका १५८, १५६, १२०, १२६ भाग लगायतका भिडियोहरु युट्युबबाट बिना अनुमति साभार गरी टेलिभिजनले दुरुपयोग गरेको छ । बिगत तीन वर्षदेखि सिए क्षेत्रका समाचारहरु सम्प्रेषण गर्दै आएको सिए सरोकार टेलिभिजन कार्यक्रम हाल न्युज २४ टेलिभिजनमा प्रशारण भइरहेको छ ।
टेलिभिजनले गरेको उक्त कार्यप्रति कार्यक्रम निर्माता सुरज प्याकुरेलले खेद प्रकट गरेका छन् । ‘हाम्रो सम्पत्ति हाम्रो अनुमति विना प्रयोग गरिएको छ । अझ दुखलाग्दो कुरा त कार्यक्रममा प्रस्तुत भएका अधिकांस कुराहरु गलत छन् भने ती गलत कुराहरुको रिपोर्ट बनाएर हाम्रो फुटेज प्रयोग गरिनुले हामीलाई ठुलो क्षति पुगेको छ ।’ कार्यक्रम निर्माता सुरज प्याकुरेलले भने । उनले कतिपय गलत कुराहरु प्रस्तुत गर्दा विना अनुमति अरुको फुटेज चोरी गरी प्रयोग गरिनु खेदजनक भएको बताएका छन् ।
उनी अगाडी भन्छन्, ‘कार्यक्रमका आइक्यानका कतिपय ऐनहरुको अपवाख्या गरिएको छ । त्यसमा हाम्रो कुनै आपत्ति होइन । समाचारमा आइक्यान अध्यक्षको हवाला दिंदै दर्जन बढी ठाउँमा गलत कुरा बोलिएकोमा पनि हाम्रो आपत्ति होइन । त्यो त दर्शकले फैसला गर्ने कुरा हो वा प्रेस काउन्सिलले नियमन गर्ने कुरा हो । कार्यक्रममा अधिकांस कुरा गलत भनिएपनि पत्रकार आचारसंहिता अनुसार हामीले त्यसको खण्डन गर्नु उचित होइन ।
तर सम्बन्धन, आइक्यानका कतिपय ऐन, लगायतका गलत कुरा प्रशारण गर्दा विना अनुमति हाम्रो फुटेजको दुरुपयोग भएको छ । बिगत लामो समयदेखि सिए क्षेत्रको सहि र निष्पक्ष समाचार दिने माध्यममा रुपमा चिनिएका हामीलाई, हाम्रो फुटेज प्रयोग गरी बनाइएको गलत समाचारका कारण आर्थिक तथा सामाजिक क्षति भएको छ । जसको हामी घोर भ्रत्सना गर्दै क्षतिपुर्तिको माग सहित प्रहरी र प्रेस काउन्सिल जाँदैछौं ।’
यसबारे बुझ्न खोज्दा कार्यक्रम निर्माता सम्पर्कमा आएका छैनन् । आफ्नो फुटेज गलत रुपमा प्रयोग भएको भन्दै उक्त कार्य सच्याउन र विना अनुमति अर्काको फुटेज प्रयोग गरीएकोमा त्यसको क्षतिपूर्ति बापत १० लाख रुपैयाँ पाउँ भनी सिए सरोकार टेलिभिजन कार्यक्रमका तर्फबाट कार्यक्रम निर्माता प्रहरीकहाँ पुग्ने भएका छन् ।
‘कार्यक्रममा आइक्यान अध्यक्ष प्रकाश लम्शाललाई ‘कोट’ गर्दै काठमाडौँमा विभिन्न सिए इन्स्टिच्युटहरु सम्बन्धन नलिइ संचालन गरिएका र तीनले विद्यार्थी ठगीरहेको भनिएको छ । जवकी सुरेश देवकोटा, भरत रिजाल, भवनाथ दाहाल लगायतका अधिकांस काउन्सिल सदश्यहरुले कोचिङ सेन्टरलाई सम्बन्धन अनिवार्य नभएको स्पष्ट पारिसकेका छन् । ‘कार्यक्रममा अन्य थुप्रै गलत कुराहरु भनिएको छ । त्यसलाई नैतिक रुपमा हामीले खण्डन गर्न मिल्दैन । ‘ प्याकुरेलले अगाडी भने ।
‘के सहि हो के गलत हो भन्ने कुरा धेरैमाझ छरपष्ट छ । कार्यक्रममा दर्जन बढी ठाउँमा हुँदै नभएका कुराहरु बोलिएको छ । ती गलत कुराहरु बोलिएकोमा होइन कि ती गलत कुरा बोल्दा हाम्रो फुटेज प्रयोग भएकोमा हाम्रो आपत्ति हो । यसले हिमालय टेलिभिजनले बनाएको रिपोर्ट माथिनै औंला उठेको कुरामा पनि हाम्रो कुनै आपत्त्ति छैन । तर हाम्रो फुटेज दुरुपयोग भएकोमा हाम्रो घोर आपत्ति छ ।’ उनले थपे ।
‘आफ्नो नाम नबताउने सर्तमा टेलिभिजनकै केहि साथीहरुले उक्त फुटेज प्रयोग गर्न आइक्यान अध्यक्षले नै लगाएको भन्ने कुरा पनि आएको छ । प्रहरी र प्रेस काउन्सिलले यसको छानविन गरेपछि सत्यतथ्य अवश्य बाहिर आउनेछ ।’ कार्यक्रम निर्माता सुरज प्याकुरेलले भने ।
यस बिषयमा कार्यक्रम निर्माता अगाडी भन्छन्, ‘हामी कानुनी उपचारका क्रममा छौं । कानुनभन्दा कोहि माथि हुँदैन । हामीले न्याय नपाएसम्म अन्तिम समयसम्म पनि हिमालय टिभीका विरुद्ध लडीरहन्छौं ।’
कार्यक्रमको ५० % भन्दा बढी ठाउँमा सिए सरोकारबाट चोरीएको फुटेजको प्रयोग भएको छ । हेरौं सिए सरोकार टेलिभिजन कार्यक्रमबाट चोरिएका केहि फुटेजहरुका स्क्रिनशट :
