काठमाडौँ – सरकार गठन भएको २३ दिन पछि भएको मन्त्रिपरिषद् विस्तारमा सभापति शेरबहादुर देउवाले दुइवटा मन्त्रालय लुकाएर रामचन्द्र पौडेललाई चक्मा दिए। पौडेलले मन्त्रीहरुको शपथ कार्यक्रममा सहभागी भएपछि मात्र आफूलाई देउवाले चक्मा दिएको पत्तो पाएका थिए।
माओवादी केन्द्रका अध्यक्ष पुष्पकमल दाहाल प्रधानमन्त्रीमा सपथ खाएकै दिन कांग्रेसले विमलेन्द्र निधि र रमेश लेखकलाई सरकारमा सहभागी गराएको थियो। नयाँ सरकार बनेदेखि नै कांग्रेसले १३ वटा मन्त्रालय भागमा परेको प्रचार गरिदैँ आएको थियो। त्यसैमा टेकेर सभापति देउवाले सुरुदेखि नै पौडेल गुटसंग बार्गेनिङ गर्दै आएका थिए। पार्टीले पाउने १३ मन्त्रालयमध्ये पौडेल समूहलाई तीनवटा दिने भन्दै संस्थापनले बार्गेनिङ सुरु गरेको थियो।
तीनबाट बढेर चारवटामा पुगेपछि संस्थापन समूहले त्योभन्दा बढी पौडेल समूहलाई मन्त्री दिन नसकिने अड्डी लियो भने पौडेलले समूहको भेला नै बसेर ४० प्रतिशत भाग नपाए आफ्नो समूह सरकारमै नजाने निर्णय गर्यो। १३ को ४० प्रतिशत अर्थ हुन्थ्यो पाँचजना मन्त्री। तर, देउवाले उपप्रधानमन्त्री निधिलाई पठाएर दुइवटा मन्त्रालय बढाएको पौडेलले पत्तो नै पाएनन्।
निधिले प्रधानमन्त्री दाहाललाई भेटेर १५ मन्त्रालय नदिए पार्टी सरकारमै नरहने संकट उत्पन्न भएको भन्दै दाहालसंग लम्पसार परेपछि दुईवटा मन्त्रालय थपिएको थियो। दुईवटा मन्त्रालय पाएपछि निधिले पौडेललाई भेटेर पाँचजना मन्त्री दिने वचन दिए र नाम पठाउन आग्रह गरे।
- बुधबार साप्ताहिक