काठमाडौँ – प्रधानमन्त्री पुष्पकमल दाहाल ‘प्रचण्ड’ ले भारतीय प्रधानमन्त्री नरेन्द्र मोदीलाई आफूले राजनीतिक विषय समेटेर पत्र नलेखेको बताएका छन् ।
प्रचण्डले पत्रको विषयलाई लिएर आफ्नाबारे भ्रमपूर्ण प्रचार गरिएकामा दुःख लागेको बताए ।
नेपालको संविधानमा संशोधन आवश्यक छ या छैन भन्ने विषयको निक्र्यौल नेपाली आफैंले गर्ने भन्दै उनले त्यस्तो विषयमा छिमेकी प्रधानमन्त्रीलाई पत्र लेखेको आधारहीन आरोप नलगाउन विपक्षी एमालेलाई आग्रह गरे ।
प्रधानमन्त्रीले आफ्ना विशेषदूत उपप्रधान एवं गृहमन्त्री विमलेन्द्र निधि भारत जाँदा मोदीलाई पत्र लेखेका थिए ।उक्त पत्रले नेपालको आन्तरिक मामिलामा अस्तक्षेप निम्त्याउन खोजेको आरोप एमालेले लगाएको छ ।
‘मैले पत्रमा दुई देशबीचको उच्चस्तरीय भ्रमण र भ्रमणका एजेण्डाबारे मात्र उल्लेख गरेको छु’, ‘सिधा कुरा प्रधानमन्त्रीसँग’ कार्यक्रमका लागि पत्रकार बबीन शर्मासँग शनिबार राति उनले भने, ‘संविधान संशोधन गर्न आवश्यक छ या छैन भन्ने कुराको निर्णय हामीले गर्ने हो, साथीहरुले गरेको प्रचारबाट दुःख लागेको छ ।’
उनले एमालेले आफूविरुद्ध गरेको प्रचारबाजी नमीठो लागेको सुनाए । आधारहीन र झुट प्रचारबाजीले क्षणिक आत्मरती मिले पनि दिर्घकालिन रुपमा एमाले पछुताउने उनको भनाइ थियो । प्रचण्डले आफू प्रधानमन्त्री भएसँगै उत्तर र दक्षिण छिमेकीसँग सन्तुलिन सम्बन्ध कायम गर्न थालेको प्रचारबाट भयभित भएर एमाले गलत प्रचारमा लागेको आरोप लगाए ।
