काठमाडौँ – पूर्वसभासद् शान्ता चौधरीमाथि अर्काे आपत आइलागेको छ । दाङको लक्ष्मीपुरस्थित घरमा गएराती लुटपाट भएको छ चोरले ल्यापटप, ट्याव, केही गरगहना र खुत्रुकेमा जम्मा गरिएको झण्डै १५ हजार लगायतको धनमाल चोरेर लगेको छ ।
पूर्वकम्लरी समेत रहेकी एमाले नेतृ शान्ताले आजसम्म कमाएको र उपहारमा प्राप्त भएको सम्पत्ति सबै लुटिएको बताएकीछिन । छोरीका लागि पछि चाहिएला भनी बनाएका केही गहना, आमाले केही पुख्र्यौली गहना दिनुभएको थियो, साथीहरुले उपहार स्वरुप दिएका ल्यापटप र प्यानटप समेत चोरी भएको छ ।
गरिवी र राजनीति नामक पुस्तक प्रकाशनको तायरीमा रहेकी चौधरीको त्यही ल्यापटप चोरी समेत भएको छ । शान्ता क्यान्सर पीडित हुन् । लामो समयको उपचारपछि क्यान्सर मुक्त हुँदैछिन् । विभिन्न रोगव्यादीले च्यापेकी शान्ता संर्घषशील व्यक्तिका रुपमा परिचित छिन् । दुई सन्तानकी आमा शान्ता १८ बर्ष कम्लरी बसेकी थिइन् ।
लक्ष्मीपुरको डाँडा गाऊँस्थित घरमा उनी एक्लै बस्दै आएकी छिन् । उनका छोरा र छोरी काठमाडौंमा पढ्दछन् । शान्ता जेठानीको छोराको विहेका लागि घरबाहिर रहेको अवस्थामा घरमा लुटपाट भएको हो ।
- एस काठमाडौँ
