- सुरज प्याकुरेल / अर्थ सरोकार डटकम
काठमाडौँ – आन्तरिक राजस्व विभागको वेव साइटमा एक महिनाअघि देखिएको समस्या अझैपनि पूर्ण रुपमा समाधान हुन सकेको छैन । साइटमा निरन्तर समस्या हुँदा करदाता मर्कामा परेका छन् भने समयमा विवरण नबुझाएको भन्दै जरिवाना पर्न सक्ने सम्भावनाले करदातालाई अफ्ट्यारोमा पारेको छ । साइटमा घरी खुल्ने घरी नखुले, भेरिफाइ नहुनेजस्ता समस्याहरु देखिएका छन् ।
अर्थ सरोकार डटकमसँग कुराकानी गर्दै आन्तरिक राजस्व विभागका प्रवक्ता राममणि दुवाडीले आफ्ना कर्मचारीहरु र परामर्श दिइरहेको कम्पनी पीसीएस गरी कुल २५ कर्मचारी काम गरीरहेको भएपनि समस्याको समाधान ननिस्किएको स्वीकार गरेका छन् । ‘समस्या कहाँ नेर छ भन्ने नै थाहा भएको छैन। हाम्रा कर्मचारीहरु लागिरहनु भएको छ ।’ उनले भने ।
यता विभागका सुचना प्रविधि विज्ञ प्रेम शरण श्रेष्ठले पनि साइटमा जटिल समस्या आएको र समस्याको समाधान खोजीरहेको बताएका छन् । ‘हामी रात दिन काम गरिरहेका छौं । कतै कोडमा त्रुटि भएको छ भन्ने हाम्रो प्रारम्भिक अनुमान छ र्याही अनुसार काम भइरहेको छ। ‘ अहिले होइन हामी समस्या आएको दिनदेखिनै निरन्तर यो समस्या समाधान गर्न लागिरहेका छौं तर पूर्ण रुपमा सफल भएका छैनौं ।
यता सुचना प्रविधि साखाका कर्मचारी विनोध विडारी भन्छन्, ‘हामी राती पनि काम गरीरहेका छौं । कतिपय करदाताले राती पनि विभागको फोन उठेको भन्दै खुसी व्यक्त गर्नुहुन्छ । हाम्रो तर्फबाट केहि कसुर बाँकी राखेका छैनौं । ‘ यता सोहि साखाका दिपेश लेखक भन्छन्,’करदातालाइ हामीले कामनै गरेको छैनौं भन्ने लागेको होला जुन सरासर गलत छ । केहि समस्या समाधान भएको छ र केहि बाँकी छ । तर समस्या आएको पहिलो दिनदेखि नै हामी अहोरात्र लागिरहेका छौं ।’
