काठमाडौं – नपाउँदा चिच्याउने, पाएपछि एक्लै खाने कम्युनिस्टहरूको नैतिक चरित्र जस्तै भएको छ । यस्तै चरित्र देखाउँदा प्रचण्ड सरकारमा माओवादीबाट मन्त्री बनेका विरुद्धको उजुरीको चाङ हेडक्वाटरमा पुग्न थालेको छ ।

सरकारमा प्रतिनिधित्व गर्ने उपप्रधानमन्त्री कृष्णबहादुर महरा र मन्त्री जनार्दन शर्माबाहेक अरू मन्त्रीले कार्यकर्तालाई वास्ता नगरेको उजुरी हेडक्वाटरमा पुगेको हो । खेलुकदमन्त्री दलजित श्रीपालीलाई ५ दिनअघि भेट्न उनको कार्यालयमा पुगेका माओवादी केन्द्रका एक कार्यालय सदस्यलाई समेत उनले समय नदिएको थाहा भएको छ । झन्डै ४५ मिनेटको पर्खाइपछि उनी फर्केर आएको विषय अहिले माओवादीभित्र चर्चामा छ ।

मन्त्री श्रीपालीलाई बारम्बार फोन गर्दा समेत स्वकीय सचिवले मात्रै उठाउने गरेको र फोनमा समेत सम्पर्कमा नआउने गरेको उजुरी प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डसमक्ष पुगेको छ । प्रचण्डसमक्ष पुगेको उजुरीमा श्रीपाली कार्यकर्तासँग फोन सम्पर्कमा नआउने, कार्यकर्ता र पार्टीका नेतालाई बेवास्ता गर्ने र कार्यकर्ताले ल्याएको विकासका काममा चासो नदेखाउने गरेको उल्लेख भएको स्रोतका दाबी छ । 

त्यसैगरी, अर्का मन्त्री हितबहादुर पाण्डेले गर्ने गरेको व्यवहारलाई लिएर पनि प्रचण्डको कानमा खबर पुगेको छ । पाण्डेको भने उनको व्यक्तिगत नभई सचिवालयको विषयमा खबर पुगेको जनाएको छ । पाण्डेका सचिवालयले कार्यकर्तासँग टेलिफोन गर्ने गरेको व्यवहार र मन्त्रीसँगको सम्पर्क जुटाउन गरेको आलटालका खबर प्रचण्डको कानमा पुगेको छ । प्रचण्डकहाँ पुगेका खबरमा मन्त्री श्रीपाली र पाण्डेले मात्रै होइन, शिक्षामन्त्री डिआर पौडेल, सञ्चारमन्त्री राम कार्कीका बारेमा समेत टिप्पणी गरेका छन् । यद्यपि, कार्कीबारे प्रचण्डसँग खबर पुगेपछि त्यसको सुनुवाइ र आवश्यक कारबाही भइसकेको स्रोतले बतायो । मन्त्री श्रीपालीलाई भने आवश्यक छानबिन भइरहेको प्रचण्ड निकट स्रोतको दाबी छ ।